મંગળ પહેલાં ચાંદ પર શહેર બનાવશે એલન મસ્ક, 10 વર્ષની અંદર ત્યાં રહેવા લાગશે માનવ! જાણો SpaceXનો નવો પ્લાન

દુનિયાના સૌથી અમીર વ્યક્તિ અને SpaceXના માલિક એલન મસ્કે મંગળ ગ્રહ પર માનવોને વસાવવા અંગેના પોતાના પ્લાનમાં મોટો ફેરફાર જાહેર કર્યો છે. રવિવાર, 8 ફેબ્રુઆરીએ એલન મસ્કે

જણાવ્યું કે, હવે તેમની સ્પેસ કંપની SpaceXનું મુખ્ય ધ્યાન મંગળ પહેલાં ચાંદ પર ‘પોતે વિકસતું શહેર’ બનાવવામાં રહેશે. તેમણે દાવો કર્યો કે, ચાંદ પર માનવ વસાહત બનાવવાનું આ મિશન 10 વર્ષથી પણ ઓછા સમયમાં પૂર્ણ થઈ શકે છે.

એલન મસ્કનું મોટું નિવેદન

એલન મસ્કે સોશિયલ મીડિયા પ્લેટફોર્મ X પર પોસ્ટમાં લખ્યું કે, “SpaceX મંગળ ગ્રહ પર પણ એક શહેર બનાવવાનો પ્રયાસ કરશે અને અંદાજે 5થી 7 વર્ષમાં તે દિશામાં કામ શરૂ કરશે, પરંતુ હાલની સર્વોચ્ચ પ્રાથમિકતા માનવ સંસ્કૃતિનું ભવિષ્ય સુરક્ષિત કરવાનું છે, અને તે ચાંદ પર વધુ ઝડપથી શક્ય બની શકે છે.

” એલન મસ્કનું આ નિવેદન વોલ સ્ટ્રીટ જર્નલમાં શુક્રવારે પ્રકાશિત થયેલી રિપોર્ટને સમર્થન આપે છે. રિપોર્ટમાં કહેવામાં આવ્યું છે કે, SpaceXએ પોતાના રોકાણકારોને જાણ કરી છે કે તે પહેલાં ચંદ્ર મિશન પર ધ્યાન આપશે અને પછી મંગળ મિશન હાથ ધરશે. કંપની માર્ચ 2027માં બિન-માનવ યાનને ચાંદ પર ઉતારવાનું લક્ષ્ય રાખે છે.

ગયા વર્ષે મસ્કે કહ્યું હતું કે, 2026ના અંત સુધીમાં મંગળ પર માનવ વિનાનું મિશન મોકલવાનું તેમનું લક્ષ્ય છે, પરંતુ હવે લાગે છે કે આ યોજના આગળ ધપાવવામાં આવશે નહીં.

SpaceX શું છે?

SpaceXનું પૂરું નામ Space Exploration Technologies Corp છે. આ એક ખાનગી અમેરિકન એરોસ્પેસ ઉત્પાદક અને અંતરિક્ષ પરિવહન સેવા કંપની છે. આ કંપની દુનિયાના સૌથી શક્તિશાળી રૉકેટ બનાવે છે. તેની સ્થાપના એલન મસ્ક દ્વારા 2002માં કરવામાં આવી હતી. કંપનીનો મુખ્ય હેતુ અંતરિક્ષ યાત્રાનો ખર્ચ ઓછો કરવાનો છે. તે માટે તેઓ એવા રૉકેટ બનાવે છે જે લોન્ચ પછી સુરક્ષિત રીતે પૃથ્વી પર પરત આવી શકે અને ફરીથી ઉપયોગમાં લઈ શકાય.

રૉકેટ અને AIને સાથે લાવી રહ્યા છે મસ્ક

આ દાયકામાં અમેરિકા ચાંદ પર ફરીથી અંતરિક્ષ યાત્રીઓને ઉતારવાના પ્રયાસમાં છે અને તેને ચીન તરફથી કડક સ્પર્ધાનો સામનો કરવો પડી રહ્યો છે. 1972માં થયેલા અંતિમ અમેરિકન અપોલો મિશન પછી કોઈ માનવ ચાંદ પર ગયો નથી.

જો SpaceXની વાત કરીએ તો એક સોદા હેઠળ એલન મસ્કની AI કંપની xAIના અધિગ્રહણ માટે સંમતિ દર્શાવવામાં આવી છે. આ સોદામાં રૉકેટ કંપનીની કિંમત 1 ટ્રિલિયન ડોલર અને AI કંપનીની કિંમત 250 બિલિયન ડોલર આંકવામાં આવી છે.