ભરૂચ ઝઘડિયા GIDC વિસ્ફોટ: નાઈટ્રેક્સ કેમિકલ પ્લાન્ટમાં એકનું મોત, બીજો ગંભીર

ભરૂચ: ઝઘડિયા GIDC ખાતે આવેલી નાઈટ્રેક્સ કંપનીમાં મંગળવાર, 9 ડિસેમ્બરની વહેલી સવારમાં થયેલા ભયાનક વિસ્ફોટથી વિસ્તારમાં દહેશત ફેલાઈ. પ્લાન્ટમાં ચાલતી રસાયણિક પ્રક્રિયા દરમિયાન બોલ ડાયજેસ્ટરમાં દબાણ વધી જતાં જોરદાર ધડાકો થયો હતો.

ઘટના વખતે નજીકમાં ફરજ બજાવતા બે શ્રમિકો તેની ઝપેટમાં આવ્યા. એકનું ઘટના સ્થળે જ મોત નીપજ્યું છે, જ્યારે બીજો ગંભીર રીતે ઘાયલ થઈ હોસ્પિટલમાં સારવાર હેઠળ છે. ડોક્ટરો મુજબ તેની સ્થિતિ નાજુક છે.

વિસ્ફોટનો અવાજ દૂર સુધી સંભળાતા આસપાસના ઉદ્યોગોમાં કામ કરતા લોકો બહાર આવી ગયા. પ્લાન્ટમાંથી ઊઠતા ધુમાડાના ગોટાળા વિસ્તારમાં દહેશતનું વાતાવરણ સર્જતા જોવા મળ્યા.

જાણ થતાં જ ઝઘડિયા પોલીસ અને ફાયર બ્રિગેડની ટીમો સ્થળ પર પહોંચી આગ નિયંત્રણ અને બચાવ કામગીરી શરૂ કરી. પ્રાથમિક તપાસ મુજબ વધેલું દબાણ વિસ્ફોટનું કારણ લાગી રહ્યું છે, જોકે ચોક્કસ કારણ માટે તપાસ ચાલુ રાખવામાં આવી છે.

આ ઘટનાએ ફરી એકવાર GIDC અને રસાયણિક ઉદ્યોગોમાં સુરક્ષા વ્યવસ્થાઓ અંગે ગંભીર પ્રશ્નો ઊભા કર્યા છે. સ્થાનિકો દ્વારા સુરક્ષા ધોરણોની કડક ચકાસણીની માંગ ઉઠાવવામાં આવી રહી છે.