સોનાના ભાવમાં પણ મોટો ઘટાડો ; ચાંદીમાં એકસાથે ₹5,800નું ગાબડું

ગુરુવારે સવારથી જ રોકાણકારો માટે મોટા સમાચાર સામે આવ્યા છે. સતત તેજી પછી કોમોડિટી માર્કેટમાં સોના-ચાંદીના ભાવમાં નોંધપાત્ર ઘટાડો જોવા મળ્યો છે. ખાસ કરીને ચાંદીમાં ભારે ગાબડું પડતા બજારમાં ચર્ચાનો માહોલ છે. બીજી તરફ શેરબજારમાં પણ દિવસની શરૂઆતથી જ ઉતાર-ચઢાવ જોવા મળ્યો.

ચાંદીના ભાવમાં એકઝટકે 5,804નો ઘટાડો

મલ્ટી કોમોડિટી એક્સચેન્જ ઓફ ઇન્ડિયા (MCX) પર ચાંદી ગુરુવારે તેના પાછલા બંધ ભાવ 2,78,364ની સરખામણીએ સીધી ઘટીને 2,72,560 પર ખૂલી હતી. આમ, 1 કિલો ચાંદીના ભાવમાં 5,804 રૂપિયાનો તાત્કાલિક ઘટાડો નોંધાયો છે. ઉલ્લેખનીય છે કે 29 જાન્યુઆરીએ ચાંદી 4,20,048ના ઓલ-ટાઈમ હાઈ લેવલ સુધી પહોંચી હતી. તે સ્તરથી હાલના ભાવોની સરખામણી કરીએ તો ચાંદી અંદાજે 1,47,488 રૂપિયા સસ્તી થઈ ગઈ છે.

સોનામાં પણ નરમી

ચાંદીની સાથે સોનાના ભાવમાં પણ ઘટાડો નોંધાયો છે. MCX પર 2 એપ્રિલ એક્સપાયરીવાળું સોનું બુધવારે 1,61,145 પર બંધ થયું હતું, જ્યારે ગુરુવારે 1,60,516 પર ખૂલ્યું હતું. એટલે કે પ્રતિ 10 ગ્રામ સોનામાં 629 રૂપિયાનો ઘટાડો થયો છે. સોનું પણ તેના હાઈ લેવલ 1,93,096થી અત્યાર સુધીમાં અંદાજે 32,580 રૂપિયા તૂટી ચૂક્યું છે. સતત વધારા બાદ આવો ઘટાડો રોકાણકારોમાં સાવચેતીનો સંદેશ આપી રહ્યો છે.

શેરબજારમાં ‘કન્ફ્યુઝન’ જેવી સ્થિતિ

કોમોડિટી માર્કેટમાં ઘટાડા વચ્ચે શેરબજારમાં પણ અનિશ્ચિતતા જોવા મળી. BSE Sensex 82,276ના પાછલા બંધની સામે 82,418 પર ખૂલ્યો હતો, પરંતુ થોડા જ મિનિટોમાં ઘટીને 82,244 સુધી આવી ગયો. ત્યારબાદ ફરી આશરે 200 પોઈન્ટનો ઉછાળો નોંધાયો. તે જ રીતે Nifty 50 25,482ના બંધની સામે 25,556 પર ખૂલ્યા બાદ 25,487 સુધી લપસી ગયો હતો. સમાચાર લખાયા સુધી નિફ્ટી આશરે 50 પોઈન્ટના વધારા સાથે ટ્રેડ કરી રહ્યો હતો.

રોકાણકારો માટે સંકેત

સોના-ચાંદીમાં આવેલા આ ઘટાડાને બજાર વિશ્લેષકો પ્રોફિટ બુકિંગ અને વૈશ્વિક સંકેતો સાથે જોડીને જોઈ રહ્યા છે. શેરબજારમાં દેખાતી અસ્થિરતા દર્શાવે છે કે રોકાણકારો હજુ પણ સ્પષ્ટ દિશાની રાહ જોઈ રહ્યા છે. આવતા દિવસોમાં વૈશ્વિક બજાર, ડોલર ઈન્ડેક્સ અને વ્યાજદર સંબંધિત સંકેતો કોમોડિટી તથા ઇક્વિટી માર્કેટની ચાલ નક્કી કરી શકે છે.