T20 World Cup 2026 પહેલા ટીમ ઇન્ડિયાને મોટો આઘાત: એશિયા કપ હીરો તિલક વર્મા ગંભીર ઈજાને કારણે બહાર, શ્રેયસ અય્યરની વાપસી શક્ય

ટી20 વર્લ્ડ કપ 2026 શરૂ થવામાં માત્ર એક મહિનો બાકી છે ત્યારે ટીમ ઇન્ડિયાને મોટો ફટકો લાગ્યો છે. મિડલ ઓર્ડરના આક્રમક બેટ્સમેન અને એશિયા કપ 2025 ફાઇનલના હીરો તિલક વર્મા ગંભીર ઈજાના કારણે આગામી 3થી 4 અઠવાડિયા સુધી ક્રિકેટથી દૂર રહી શકે છે.

શું થયું હતું તિલક વર્માને?

23 વર્ષીય ડાબા હાથના બેટ્સમેન તિલક વર્મા વિજય હજારે ટ્રોફીમાં હૈદરાબાદ તરફથી રાજકોટમાં મેચ રમી રહ્યા હતા. મેચ દરમિયાન તેમને અચાનક ભારે દુખાવો થતા તાત્કાલિક ગોકુલ હોસ્પિટલમાં દાખલ કરવામાં આવ્યા. તપાસ દરમિયાન તેમને ટેસ્ટિક્યુલર ટોર્શન હોવાની પુષ્ટિ થઈ, જે એક ગંભીર તબીબી સ્થિતિ છે. ડોક્ટરોએ વિલંબ વગર સર્જરી કરવાની સલાહ આપી હતી.

સર્જરી સફળ, પરંતુ પુનઃપ્રાપ્તિમાં સમય

સૌરાષ્ટ્ર ક્રિકેટ એસોસિએશનના અધ્યક્ષ જયદેવ શાહે માહિતી આપતા જણાવ્યું કે તિલક વર્માની સર્જરી સફળ રહી છે અને હાલ તેમની સ્થિતિ સ્થિર છે. જોકે, ડોક્ટરોના જણાવ્યા અનુસાર તેમને સંપૂર્ણ રીતે ફિટ થવામાં 3થી 4 અઠવાડિયાનો સમય લાગી શકે છે.

ન્યૂઝીલેન્ડ સામેની T20 સિરીઝમાંથી બહાર

આ ઈજાના કારણે તિલક વર્મા 21 જાન્યુઆરીથી શરૂ થનારી ન્યૂઝીલેન્ડ સામેની ટી20 સિરીઝમાંથી બહાર રહી શકે છે. એટલું જ નહીં, ટી20 વર્લ્ડ કપ 2026 માટેની તેમની ઉપલબ્ધતા પણ શંકાસ્પદ બની છે.

શ્રેયસ અય્યરની T20 ટીમમાં વાપસી શક્ય

તિલકની ગેરહાજરીમાં ભારતીય ટીમ મેનેજમેન્ટ ફરી એકવાર શ્રેયસ અય્યર તરફ નજર કરી શકે છે. વનડેના ઉપકેપ્ટન શ્રેયસ અય્યરને બેંગ્લોર સ્થિત સેન્ટર ઓફ એક્સેલન્સની મેડિકલ ટીમે સંપૂર્ણ રીતે ફિટ જાહેર કર્યા છે. વિજય હજારે ટ્રોફીમાં મુંબઈ તરફથી રમતા તેમણે 53 બોલમાં 82 રનની આક્રમક ઈનિંગ રમી હતી.

ટીમ ઇન્ડિયાના મિડલ ઓર્ડર પર અસર

છેલ્લા એક વર્ષથી તિલક વર્મા ભારતના ટી20 સેટઅપનો મહત્વનો ભાગ રહ્યા છે. ખાસ કરીને એશિયા કપ 2025ની ફાઇનલમાં પાકિસ્તાન સામે 69 રનની મેચવિનિંગ ઈનિંગ રમીને તેમણે ટીમને ખિતાબ અપાવ્યો હતો. તેમની ઈજાએ વર્લ્ડ કપ પહેલા ટીમ ઇન્ડિયાની પસંદગીની સમીકરણોમાં મોટો ફેરફાર કરી નાખ્યો છે.