ચાંદીમાં ઐતિહાસિક વિસ્ફોટ: તમામ રેકોર્ડ તોડી ₹2.23 લાખને પાર, રોકાણકારો માલામાલ

Silver All Time High | Gold Price Today : ભારતીય કોમોડિટી બજાર (MCX)માં આજે કિંમતી ધાતુઓએ ઈતિહાસ રચ્યો છે. વૈશ્વિક આર્થિક અનિશ્ચિતતા વચ્ચે રોકાણકારોની સુરક્ષિત રોકાણ તરફ વધતી પસંદગીના કારણે સોના અને ચાંદીમાં જોરદાર તેજી જોવા મળી છે. ખાસ કરીને ચાંદીએ તમામ જૂના રેકોર્ડ તોડી નવા શિખર પર પહોંચીને બજારમાં ચર્ચાનો વિષય બની છે.

MCX પર ચાંદીના માર્ચ 2026ના વાયદાના ભાવમાં આજે ₹3,700નો મોટો ઉછાળો નોંધાયો હતો. 1.72 ટકાની તેજી સાથે ચાંદીનો ભાવ ₹2,23,430 પ્રતિ કિલોગ્રામ સુધી પહોંચ્યો, જે અત્યાર સુધીની સર્વોચ્ચ સપાટી છે. બજાર નિષ્ણાતોના જણાવ્યા અનુસાર, ઔદ્યોગિક માંગ અને મજબૂત રોકાણકારી ખરીદીના કારણે ચાંદીમાં આ ઐતિહાસિક તેજી જોવા મળી રહી છે.

ચાંદી હવે માત્ર દાગીના સુધી સીમિત રહી નથી. ઇલેક્ટ્રિક વાહનો, સોલાર પેનલ્સ અને ઇલેક્ટ્રોનિક ઉદ્યોગોમાં વધતા ઉપયોગને કારણે લાંબા ગાળે તેની માંગ સતત વધી રહી છે, જે ભાવોને મજબૂત સપોર્ટ આપી રહી છે.

ચાંદીની સાથે સોનાના ભાવમાં પણ મજબૂત તેજી જોવા મળી. MCX પર સોનાના ફેબ્રુઆરી 2026ના વાયદાના ભાવમાં ₹381નો વધારો થયો હતો અને ભાવ ₹1,38,312 પ્રતિ 10 ગ્રામ પર પહોંચ્યો. ડોલરની અસ્થિરતા, વ્યાજદર ઘટાડાની શક્યતા અને ભૂરાજકીય તણાવને કારણે રોકાણકારો સોનાને સલામત વિકલ્પ તરીકે પસંદ કરી રહ્યા છે.

નિષ્ણાતોનું માનવું છે કે ટૂંકા ગાળામાં નફાવસૂલી આવી શકે છે, પરંતુ લાંબા ગાળે સોના અને ખાસ કરીને ચાંદીમાં તેજીનું વલણ યથાવત રહેવાની પૂરી શક્યતા છે. વધતી ઔદ્યોગિક માંગને કારણે ચાંદી આવતા સમયમાં ફરી નવા રેકોર્ડ બનાવે તે સંભાવના નકારી શકાય નહીં.