Chhaava Film Controversy: ‘છાવા’ પર એ.આર. રહેમાનના નિવેદનથી હોબાળો, સંગીત આપ્યું તો ફિલ્મ સામે વાંધો કેમ?

Chhaava Film Controversy: બોલિવૂડ અભિનેતા વિક્કી કૌશલની અત્યાર સુધીની સૌથી મોટી હિટ ફિલ્મ ‘છાવા’ ફરી એકવાર ચર્ચાના કેન્દ્રમાં આવી ગઈ છે. આ વખતે ફિલ્મના સંગીતકાર એ.આર. રહેમાનના નિવેદનને કારણે વિવાદ સર્જાયો છે. તાજેતરના એક ઇન્ટરવ્યુમાં રહેમાને ‘છાવા’ને “વિભાજનકારી ફિલ્મ” ગણાવી હતી, જેને લઈને સોશિયલ મીડિયા પર ભારે પ્રતિક્રિયાઓ જોવા મળી રહી છે.

છત્રપતિ સંભાજી મહારાજના શૌર્ય અને બલિદાન પર આધારિત આ ફિલ્મે દર્શકો પર ઊંડી અસર કરી હતી. ફિલ્મની વિશાળ સફળતા છતાં રહેમાનના નિવેદનથી ઘણા લોકો દુઃખી થયા છે. ઘણા દર્શકો અને ચાહકોએ પ્રશ્ન ઉઠાવ્યો છે કે જો ફિલ્મ તેમને વિભાજનકારી લાગી હતી, તો તેમાં સંગીત આપવાનું તેમણે સ્વીકાર્યું કેમ?

આ વિવાદ વચ્ચે ફિલ્મના દિગ્દર્શક લક્ષ્મણ ઉતેકરે સ્પષ્ટતા કરી છે. તેમણે જણાવ્યું હતું કે ‘છાવા’ને તેઓ આંતરરાષ્ટ્રીય અભિગમ સાથે બનાવવી માંગતા હતા. તેમનો હેતુ સંભાજી મહારાજની વાર્તાને માત્ર મહારાષ્ટ્ર સુધી સીમિત ન રાખીને દુનિયાભરના દર્શકો સુધી પહોંચાડવાનો હતો. આ કારણસર તેમણે સંગીત માટે એ.આર. રહેમાનની પસંદગી કરી હતી.

ઉતેકરે કહ્યું કે અજય-અતુલ જેવા શક્તિશાળી સંગીતકારો સાથે કામ કરવું તેમનું સ્વપ્ન છે, પરંતુ ‘છાવા’ માટે તેઓ વૈશ્વિક સ્તરની લાગણી ઊભી કરવા માંગતા હતા, જેમાં રહેમાન યોગ્ય પસંદગી લાગ્યા હતા.

ઉલ્લેખનીય છે કે ‘છાવા’એ વિશ્વભરમાં ₹800 કરોડથી વધુની કમાણી કરી હતી. ફિલ્મમાં વિક્કી કૌશલ, અક્ષય ખન્ના અને રશ્મિકા મંદન્નાએ મુખ્ય ભૂમિકાઓ ભજવી હતી. ફિલ્મના મુઘલ સમ્રાટ ઔરંગઝેબના ચિત્રણને લઈને પણ રિલીઝ સમયે ભારે ચર્ચા અને વિરોધ થયો હતો.