કર્ણાટકમાં કોંગ્રેસ સરકારની બુલડોઝર કાર્યવાહી, 400થી વધુ મુસ્લિમોના ઘરો તોડી પાડ્યા

બેંગલોરમાં 400થી વધુ ઘરો તોડી પાડવાની કાર્યવાહી બાદ કર્ણાટક સરકાર ભારે વિવાદોમાં ફસાઈ ગઈ છે. આ કાર્યવાહીના કારણે સેંકડો લોકો બેઘર બન્યા છે, જેમાં મોટાભાગે મુસ્લિમ સમુદાયના લોકોનો સમાવેશ થાય છે. આ મોટા પાયાની બેદખલી કાર્યવાહી બાદ સત્તાધારી કોંગ્રેસ અને કેરળની લેફ્ટ ફ્રન્ટ યુનિટ વચ્ચે તીખું વાકયુદ્ધ શરૂ થયું છે.

400 પરિવારો બેઘર

મળતી માહિતી અનુસાર, 22 ડિસેમ્બરના રોજ વહેલી સવારે 4 વાગ્યે બેંગલોરના કોગિલુ ગામમાં ફકીર કોલોની અને વસીમ લેઆઉટ વિસ્તારમાં તોડફોડ કરવામાં આવી. આ કાર્યવાહીથી આશરે 400 પરિવારો બેઘર બન્યા. શહેરમાં વર્ષની સૌથી વધુ ઠંડી દરમિયાન આ કાર્યવાહી કરવામાં આવતાં માનવીય સંવેદનશીલતાને લઈને પ્રશ્નો ઉઠ્યા છે. બેંગલોર સોલિડ વેસ્ટ મેનેજમેન્ટ લિમિટેડ દ્વારા ચલાવવામાં આવેલા આ અભિયાનમાં 4 JCB મશીનો અને 150થી વધુ પોલીસ કર્મચારીઓ તૈનાત હતા.

નોટિસ વગર કાર્યવાહીનો આરોપ

કર્ણાટક સરકારનું કહેવું છે કે તોડવામાં આવેલા ઘરો સરકારી જમીન પર, ઉર્દૂ ગવર્નમેન્ટ સ્કૂલની નજીક આવેલા તળાવના કિનારે ગેરકાયદેસર રીતે બનાવવામાં આવ્યા હતા. જોકે, સ્થાનિક રહેવાસીઓનો દાવો છે કે તેમને કોઈપણ પ્રકારની પૂર્વ સૂચના આપવામાં આવી નહોતી અને પોલીસે જબરદસ્તી ઘરો ખાલી કરાવ્યા. આ કારણે સેંકડો લોકો કડકડતી ઠંડીમાં રસ્તા પર અથવા અસ્થાયી શેલ્ટરો હેઠળ રાત પસાર કરવા મજબૂર બન્યા છે.

છેલ્લા 25 વર્ષથી રહેતા હોવાનો દાવો

સ્થાનિક રિપોર્ટ્સ મુજબ, ઘણા રહેવાસીઓએ જણાવ્યું છે કે તેઓ છેલ્લા 25 વર્ષથી આ વિસ્તારમાં વસવાટ કરતા હતા અને તેમની પાસે માન્ય આધાર કાર્ડ તથા મતદાર ઓળખપત્ર પણ છે. બેઘર કરાયેલા મોટાભાગના લોકો સ્થળાંતરિત મજૂરો છે, જે દૈનિક મજૂરી કરીને જીવનયાપન કરે છે. આ કાર્યવાહી બાદ લોકો વિરોધ પ્રદર્શન કરવા રસ્તા પર ઉતરી આવ્યા હતા. એક જૂથે આવક મંત્રી કૃષ્ણા બાયરે ગૌડાના ઘરની નજીક પણ દેખાવો કર્યો. દલિત સંઘર્ષ સમિતિ સહિત અનેક સંગઠનોએ પણ આ કાર્યવાહી સામે વિરોધ નોંધાવ્યો છે.

કેરળના મુખ્યમંત્રી પિનારાઈ વિજયનની ટીકા

કેરળના મુખ્યમંત્રી પિનારાઈ વિજયને આ કાર્યવાહી અંગે કોંગ્રેસ સરકારની કડક ટીકા કરી છે. તેમણે X (પૂર્વે ટ્વિટર) પર લખ્યું કે, કોંગ્રેસ સરકાર હેઠળ સંઘ પરિવારની “અલ્પસંખ્યક વિરોધી રાજનીતિ” અમલમાં મૂકાઈ રહી છે.
વિજયને જણાવ્યું કે જ્યારે સરકાર ડર અને જબરદસ્તી દ્વારા શાસન કરે છે, ત્યારે સંવિધાનિક મૂલ્યો અને માનવીય ગૌરવને સૌથી પહેલા નુકસાન થાય છે. કેરળના મંત્રી વી. શિવનકુટ્ટીએ પણ આ કાર્યવાહી ને “અમાનવીય” ગણાવી અને તેને ઇમરજન્સીના સમય સાથે સરખાવી.

ડી.કે. શિવકુમારનો જવાબ

કેરળના મુખ્યમંત્રી અને CPIની ટીકા પર પ્રતિક્રિયા આપતા કર્ણાટકના ઉપમુખ્યમંત્રી ડી.કે. શિવકુમારે જણાવ્યું કે, આ વિસ્તાર અગાઉ કચરો ફેંકવાનું સ્થળ હતો અને લેન્ડ માફિયા તેને ઝૂંપડપટ્ટીમાં ફેરવવાનો પ્રયાસ કરી રહ્યા હતા.
તેમણે દાવો કર્યો કે લોકોને નવી જગ્યાએ ખસેડવા માટે પૂરતો સમય આપવામાં આવ્યો હતો અને કોંગ્રેસ સરકાર બુલડોઝર રાજનીતિમાં વિશ્વાસ રાખતી નથી.

“અમે અમારા શહેરને સારી રીતે જાણીએ છીએ”

પિનારાઈ વિજયન પર વ્યંગ કરતા શિવકુમારે કહ્યું કે નેતાઓએ જમીની હકીકત જાણ્યા વગર ટિપ્પણી ન કરવી જોઈએ. તેમણે ઉમેર્યું કે બેંગલોરની સમસ્યાઓ અંગે કર્ણાટક સરકારને સારી સમજ છે અને લેન્ડ માફિયાને વેગ આપતી ગેરકાયદેસર ઝૂંપડપટ્ટીઓને પ્રોત્સાહન આપવામાં નહીં આવે.