મુસાફરો માટે રાહત: વેબ ચેક-ઈન અને સીટ પસંદગી હવે મફત થશે

Flights Seats Charge Free : નાગરિક ઉડ્ડયન મહાનિર્દેશાલય (DGCA) દ્વારા જારી કરાયેલા આ નવા આદેશનો મુખ્ય હેતુ હવાઈ મુસાફરીને વધુ પારદર્શક અને સામાન્ય માણસ માટે સસ્તી બનાવવાનો છે. અત્યાર સુધી એવું જોવા મળતું હતું કે વેબ ચેક-ઈન કરતી વખતે લગભગ તમામ બેઠકો ‘પેઇડ’ બતાવવામાં આવતી હતી, જેના કારણે મુસાફરોએ ફરજિયાતપણે વધારાના 200 થી 1500 રૂપિયા ચૂકવવા પડતા હતા. હવે નવી નીતિ મુજબ, એરલાઇન્સે બહુમતી બેઠકો ફ્રી રાખવી પડશે, જેથી મુસાફરો પર વધારાનો આર્થિક બોજ ન પડે.

મંત્રાલયે એક મહત્વપૂર્ણ ફેરફાર એ પણ કર્યો છે કે જે મુસાફરોએ એક જ PNR પર ટિકિટ બુક કરાવી છે, તેમને એરલાઇન્સે સાથે બેસવાની સીટ ફાળવવી પડશે. અગાઉ, પરિવારો કે મિત્રોના જૂથોને અલગ-અલગ બેઠકો ફાળવી દેવામાં આવતી હતી અને જો તેમને સાથે બેસવું હોય તો ‘પ્રિફર્ડ સીટ’ના નામે વધારાના પૈસા વસૂલવામાં આવતા હતા. હવે એરલાઇન્સે સુનિશ્ચિત કરવું પડશે કે શક્ય હોય ત્યાં સુધી એક જ બુકિંગ ધરાવતા મુસાફરોને બાજુ-બાજુની બેઠકો જ મળે.

સરકારે એરલાઇન્સને આદેશ આપ્યો છે કે મુસાફરોના અધિકારો, ખાસ કરીને ફ્લાઇટમાં વિલંબ, રદ થવા કે બોર્ડિંગમાં ઇનકારની સ્થિતિમાં મળતા વળતરની માહિતી એરપોર્ટ કાઉન્ટર્સ, વેબસાઇટ્સ અને મોબાઈલ એપ પર સ્પષ્ટપણે દર્શાવવી જોઈએ. વધુમાં, આ માહિતી માત્ર અંગ્રેજી કે હિન્દીમાં જ નહીં, પણ પ્રાદેશિક ભાષાઓમાં પણ હોવી જોઈએ જેથી સામાન્ય મુસાફરો પણ પોતાના અધિકારો સમજી શકે.

ભારતનું ઉડ્ડયન ક્ષેત્ર વિશ્વનું ત્રીજું સૌથી મોટું બજાર બની ગયું છે, જ્યાં દરરોજ 50 લાખથી વધુ મુસાફરો અવરજવર કરે છે. આ ભીડને ધ્યાનમાં રાખીને સરકારે ‘ઉડાન યાત્રી કાફે’ જેવી પહેલ શરૂ કરી છે, જે એરપોર્ટ પર સસ્તું ભોજન અને મફત વાઇ-ફાઇની સુવિધા આપે છે. સાથે જ, પાલતુ પ્રાણીઓના પરિવહન, રમતગમતના સાધનો અને સંગીતના સાધનોના વહન માટે પણ એરલાઇન્સે સ્પષ્ટ અને મુસાફરોને અનુકૂળ નીતિ બનાવવાની રહેશે.