બોક્સિંગ ડે ટેસ્ટમાં વિકેટોનો ‘ભૂકંપ’: એક જ દિવસમાં બંને ટીમ ઓલઆઉટ, એશિઝમાં 124 વર્ષ જૂનો રેકોર્ડ તૂટ્યો

AUS vs ENG The Ashes 2025-26: મેલબોર્ન ક્રિકેટ ગ્રાઉન્ડ (MCG) પર શુક્રવારથી શરૂ થયેલી ચોથી એશિઝ ટેસ્ટનો પહેલો દિવસ સંપૂર્ણપણે બોલરોના નામે રહ્યો. દિવસની રમતમાં કુલ 20 વિકેટ પડી, જેના કારણે બેટ્સમેનો માટે રન બનાવવું અત્યંત મુશ્કેલ સાબિત થયું. બંને ટીમોની પ્રથમ ઈનિંગ્સ એક જ દિવસે સમેટાઈ ગઈ, જે ટેસ્ટ ક્રિકેટમાં દુર્લભ દૃશ્ય છે.

ટોસ હારીને પ્રથમ બેટિંગ કરનાર ઓસ્ટ્રેલિયા 152 રનમાં ઓલઆઉટ થઈ ગઈ. માઈકલ નેસરે 35 અને ઉસ્માન ખ્વાજાએ 29 રન બનાવી ટીમને સંઘર્ષમાં થોડો સહારો આપ્યો. ઈંગ્લેન્ડ તરફથી જોશ ટંગે ઘાતક બોલિંગ કરી 5 વિકેટ ઝડપી.

જવાબમાં ઈંગ્લેન્ડની ટીમ પણ કાંગારૂ બોલરો સામે ટકી શકી નહોતી અને માત્ર 110 રનમાં પેવેલિયન પરત ફરી. હેરી બ્રુકે 41 રન સાથે ટોચનો સ્કોર કર્યો. ઓસ્ટ્રેલિયા માટે માઈકલ નેસરે 4 અને સ્કોટ બોલેન્ડે 3 વિકેટ લઈને મેચ પર પકડ મજબૂત કરી.

પ્રથમ ઈનિંગ્સના અંતે ઓસ્ટ્રેલિયાને 42 રનની લીડ મળી, જ્યારે દિવસના અંતે બીજી ઈનિંગમાં ટીમે વિના વિકેટે 4 રન બનાવી કુલ 46 રનની લીડ મેળવી લીધી. MCG પર બોલ સતત સ્વિંગ અને સીમ થતો રહ્યો, જેના કારણે બેટિંગ કરવું લોઢાના ચણા ચાવવા સમાન બની ગયું.

એશિઝના 124 વર્ષના ઇતિહાસમાં આ માત્ર બીજી વખત છે જ્યારે પ્રથમ દિવસે 20 વિકેટ પડી હોય. આવી સ્થિતિને જોતા ક્રિકેટ નિષ્ણાતો માને છે કે આ ટેસ્ટ મેચ ત્રીજા અથવા ચોથા દિવસે જ પરિણામ આપી શકે છે. શ્રેણીમાં પહેલેથી જ 3-0થી આગળ રહેલી ઓસ્ટ્રેલિયા હવે મોટો સ્કોર બનાવી ઈંગ્લેન્ડ સામે કઠિન લક્ષ્યાંક મૂકવા પ્રયત્ન કરશે, જ્યારે ઈંગ્લેન્ડ વ્હાઈટવોશથી બચવા માટે છેલ્લો જોર લગાવશે.