ઉત્તર ભારતમાં વરસાદ અને હિમવર્ષાની એન્ટ્રી: 31 જાન્યુઆરીથી 3 ફેબ્રુઆરી સુધી 8 રાજ્યોમાં વેધર એલર્ટ

ઉત્તર ભારતમાં હવામાનનો મિજાજ ફરી બદલાવાની તૈયારીમાં છે. બે સતત પશ્ચિમી વિક્ષોભના કારણે 31 જાન્યુઆરીથી 3 ફેબ્રુઆરી દરમિયાન પશ્ચિમ હિમાલય વિસ્તારમાં મધ્યમથી ભારે વરસાદ અને હિમવર્ષાની શક્યતા વ્યક્ત કરવામાં આવી છે.

હવામાન વિભાગ મુજબ દિલ્હી-NCR, ઉત્તર પ્રદેશ, રાજસ્થાન, પંજાબ, હરિયાણા અને મધ્ય ભારતના કેટલાક વિસ્તારોમાં હળવોથી મધ્યમ વરસાદ પડી શકે છે. પહાડી વિસ્તારોમાં 3000 મીટરથી વધુ ઊંચાઈએ બરફવર્ષા થવાની સંભાવના છે.

દિલ્લી-NCRનું હવામાન

દિલ્લીમાં આગામી ત્રણ દિવસ આકાશ વાદળછાયું રહેશે. 31 જાન્યુઆરીની સાંજ અને રાત્રે ગાજવીજ સાથે વરસાદ, વીજળી પડવાની અને તેજ પવન ફૂંકાવાની શક્યતા છે. વરસાદ બાદ તાપમાનમાં ઘટાડો થતાં ઠંડીનો પ્રભાવ વધશે.

ઉત્તર પ્રદેશ અને ઉત્તરાખંડ

ઉત્તર પ્રદેશમાં આજે ધુમ્મસ જોવા મળી શકે છે, જ્યારે 1 ફેબ્રુઆરીથી વરસાદ શરૂ થવાની શક્યતા છે. ઉત્તરાખંડના ઉત્તરકાશી, ચમોલી, પિથોરાગઢ સહિતના જિલ્લાઓમાં હળવોથી મધ્યમ વરસાદ અને ઊંચા વિસ્તારોમાં હિમવર્ષાની આગાહી કરવામાં આવી છે.

હિમાચલ પ્રદેશ અને જમ્મુ-કશ્મીર

હિમાચલ પ્રદેશમાં 1 થી 3 ફેબ્રુઆરી દરમિયાન વરસાદ અને બરફબારી માટે યેલો અલર્ટ જાહેર કરાયું છે. જમ્મુ-કશ્મીરમાં 2 ફેબ્રુઆરી સુધી વરસાદ અને હિમવર્ષાની ચેતવણી છે.

રાજસ્થાન, પંજાબ અને હરિયાણા

રાજસ્થાનના અજમેર, જયપુર અને કોટા સહિત અનેક વિસ્તારોમાં 3 ફેબ્રુઆરી સુધી વરસાદ પડી શકે છે. પંજાબ અને હરિયાણામાં રાત્રે ગાજવીજ સાથે હળવો વરસાદ અને કેટલાક સ્થળોએ ઓલાવૃષ્ટિની શક્યતા છે.