સોનું ₹1.62 લાખને પાર: Middle East સંકટ વચ્ચે કિંમતી ધાતુઓમાં તેજી

મલ્ટી કોમોડિટી એક્સચેન્જ (MCX) પર બપોરે 1:36 વાગ્યા સુધી એપ્રિલ ડિલિવરી વાળું સોનું ₹361 (0.22%)ના વધારા સાથે ₹1,62,150 પ્રતિ 10 ગ્રામ પર ટ્રેડ થતું જોવા મળ્યું હતું. કારોબારની શરૂઆતમાં સોનામાં થોડો ઘટાડો નોંધાયો હતો, પરંતુ નીચલા સ્તરેથી આવેલી ખરીદીના કારણે તેમાં ફરી તેજી જોવા મળી.

બજાર નિષ્ણાતોના જણાવ્યા મુજબ સોનાના ભાવ માટે ₹1,56,000થી ₹1,57,000નો વિસ્તાર મજબૂત સપોર્ટ ઝોન તરીકે કામ કરી રહ્યો છે. જો સોનું ₹1,65,000ની સપાટી પાર કરે છે તો આગામી દિવસોમાં તે ₹1,75,000થી ₹1,80,000 સુધી પહોંચવાની શક્યતા વ્યક્ત કરવામાં આવી રહી છે.

ચાંદીમાં નોંધપાત્ર ઉછાળો
ચાંદીના ભાવમાં આજે જોરદાર વધારો નોંધાયો છે. MCX પર મે ડિલિવરી વાળી ચાંદી ₹5,911 (2.20%) વધીને ₹2,74,402 પ્રતિ કિલોગ્રામ સુધી પહોંચી ગઈ છે. બજાર નિષ્ણાતોના મતે વૈશ્વિક અનિશ્ચિતતા વચ્ચે ચાંદીમાં પણ સુરક્ષિત રોકાણ તરીકે ભારે લેવાલી જોવા મળી રહી છે. ઉદ્યોગ ક્ષેત્રમાં વધતી માંગ અને રોકાણકારોની ખરીદી બંને કારણોસર ચાંદીના ભાવમાં મજબૂતી જોવા મળી રહી છે.

રૂપિયા ઐતિહાસિક નીચલા સ્તરે
વધતા ક્રૂડ ઓઈલના ભાવ અને મજબૂત અમેરિકન ડોલરના કારણે ભારતીય રૂપિયાની કિંમત પર પણ દબાણ આવ્યું છે. ગુરુવારે રૂપિયા ડોલર સામે લગભગ 0.3% ઘટીને 92.3575ના ઐતિહાસિક નીચલા સ્તરે પહોંચી ગયો છે. આ અગાઉ પણ આ સપ્તાહ દરમિયાન રૂપિયો 92.3475ના સ્તર સુધી ગગડી ગયો હતો, પરંતુ હવે તે રેકોર્ડ ફરી તૂટી ગયો છે.