Gold–Silver Price Crash: ઐતિહાસિક તેજી બાદ બજારમાં મોટું કરેક્શન, સોનું ₹8,800 અને ચાંદી ₹24,000 તૂટ્યા

છેલ્લા કેટલાક દિવસોથી સોનું અને ચાંદીમાં જોવા મળેલી ઐતિહાસિક તેજી બાદ હવે બજારમાં મોટું કરેક્શન નોંધાયું છે. સતત બીજા દિવસે ભારતીય કોમોડિટી માર્કેટમાં કિંમતી ધાતુઓ પર ભારે વેચવાલી જોવા મળી છે, જેના કારણે રોકાણકારોમાં સાવચેત માહોલ સર્જાયો છે.

આંતરરાષ્ટ્રીય બજારમાં નફાખોરી (Profit Booking) વધવી અને અમેરિકન ડૉલર મજબૂત બનવો આ ઘટાડાના મુખ્ય કારણો તરીકે જોવામાં આવી રહ્યા છે. તાજેતરમાં સોનું અને ચાંદી બંનેએ પોતાના ઓલ-ટાઇમ હાઈ લેવલ સ્પર્શ્યા હતા, જેના બાદ મોટા રોકાણકારોએ નફો બુક કરવાનું શરૂ કર્યું.

સોનાના ભાવમાં મોટો કડાકો

સોનાના ભાવમાં આજે નોંધપાત્ર ઘટાડો જોવા મળ્યો છે. અગાઉના સત્રમાં સોનું પ્રતિ 10 ગ્રામ ₹1,83,962 પર બંધ થયું હતું. આજના ટ્રેડિંગ સેશનની શરૂઆત ₹1,80,499 થી થઈ હતી, પરંતુ ભારે વેચવાલી વચ્ચે ભાવ લુઢકીને ₹1,78,326 સુધી પહોંચ્યા.

આ રીતે સોનાના ભાવમાં એક જ દિવસમાં ₹8,862 પ્રતિ 10 ગ્રામનો ઘટાડો, એટલે કે અંદાજે 3.06%નો કડાકો નોંધાયો. સેશનના અંત તરફ થોડી ખરીદી દેખાઈ હોવા છતાં ભાવ દબાણમાં જ રહ્યા.

ચાંદીમાં વધુ તીવ્ર વેચવાલી

ચાંદીના ભાવમાં સોનાની સરખામણીએ વધુ આક્રમક ઘટાડો જોવા મળ્યો છે. અગાઉના સત્રમાં ચાંદી ₹3,99,893 પ્રતિ કિલોના ભાવ પર બંધ થઈ હતી, જ્યારે આજે તે ₹3,83,898 પર ઓપન થઈ.

કારોબાર દરમિયાન ભાવ લુઢકીને ₹3,79,831 સુધી પહોંચ્યા, જે ગત બંધ ભાવની સરખામણીએ 5.02%નો ઘટાડો દર્શાવે છે. આ રીતે માત્ર એક જ દિવસે ચાંદીમાં ₹23,993 પ્રતિ કિલોનો જંગી ઘટાડો નોંધાયો.

ઘટાડા પાછળના મુખ્ય કારણો

બજાર નિષ્ણાતોના મતે, કિંમતી ધાતુઓ તાજેતરમાં રેકોર્ડ ઊંચાઈએ પહોંચતાં પ્રોફિટ-ટેકિંગ સ્વાભાવિક બની ગયું હતું. સાથે જ, વૈશ્વિક સ્તરે ડૉલર મજબૂત બનતાં સોનું અને ચાંદી ડૉલર સિવાયની કરન્સીમાં મોંઘા પડતા તેમની માંગ પર અસર પડી છે.

લાંબા ગાળાનો દૃષ્ટિકોણ

જોકે ટૂંકા ગાળામાં બજારમાં ભારે ઉથલપાથલ જોવા મળી રહી છે, પરંતુ લાંબા ગાળે સોનું અને ચાંદી માટે દૃષ્ટિકોણ સંપૂર્ણપણે નકારાત્મક નથી. વૈશ્વિક આર્થિક અનિશ્ચિતતા, મહેસૂલી ચિંતા અને ભૌગોલિક તણાવને કારણે આ ધાતુઓ હજી પણ Safe Haven Investment તરીકે જોવામાં આવે છે.

નિષ્ણાતોનું માનવું છે કે આ કરેક્શન લાંબા ગાળાના રોકાણકારો માટે ખરીદીની તક પણ બની શકે છે, જોકે હાલ બજાર ભાગીદારો ડૉલરની ચાલ અને આંતરરાષ્ટ્રીય સંકેતો પર નજીકથી નજર રાખી રહ્યા છે.