હાર્દિક પંડ્યા ફરી એકવાર ટીમ ઈન્ડિયાનો કેપ્ટન બનશે! 2026માં પસંદગીકારો લઈ શકે છે મહત્વપૂર્ણ નિર્ણય

T20 ક્રિકેટમાં સૂર્યકુમાર યાદવે કેપ્ટનશીપ સંભાળી ત્યારથી ભારતીય ટીમનું કુલ પ્રદર્શન શાનદાર રહ્યું છે, પરંતુ વ્યક્તિગત રીતે તેની બેટિંગ ફોર્મ ચિંતા જનક બની છે. આ પરિસ્થિતિમાં હાર્દિક પંડ્યાનું નામ ફરી એકવાર T20 ટીમ ઇન્ડિયાના કેપ્ટન તરીકે ચર્ચામાં આવ્યું છે.

હાર્દિક પંડ્યા વ્હાઇટ-બોલ ક્રિકેટમાં ભારતીય ટીમનો સૌથી વિશ્વસનીય ઓલરાઉન્ડર માનવામાં આવે છે. તે માત્ર બેટિંગ જ નહીં પરંતુ મહત્વની ક્ષણોમાં બોલિંગથી પણ મેચનો પલડો ફેરવવાની ક્ષમતા ધરાવે છે. T20 વર્લ્ડ કપમાં ભારતની સફળતામાં હાર્દિકે મહત્વપૂર્ણ યોગદાન આપ્યું હતું.

સૂર્યકુમાર યાદવનું બેટિંગ ફોર્મ ચિંતા જનક

કેપ્ટન તરીકે સૂર્યકુમારની લીડરશીપ સારી રહી છે, પરંતુ તેની બેટિંગમાં સતત ઘટાડો જોવા મળી રહ્યો છે. જો આ ફોર્મ લાંબા સમય સુધી ચાલુ રહે છે, તો પ્લેઇંગ ઇલેવનમાં પણ તેનું સ્થાન જોખમમાં પડી શકે છે.

હાર્દિક પંડ્યાનો મજબૂત કેપ્ટનશીપ રેકોર્ડ

હાર્દિકે T20Iમાં 16 મેચોમાં ટીમનું નેતૃત્વ કર્યું છે, જેમાંથી 10 મેચોમાં જીત મેળવી છે. IPLમાં ગુજરાત ટાઇટન્સને એક વખત ખિતાબ અપાવવો અને બીજી સીઝનમાં ફાઇનલ સુધી પહોંચાડવું તેની નેતૃત્વ ક્ષમતાનો પુરાવો છે.

ગિલનો T20માં સંઘર્ષ

શુભમન ગિલ ટેસ્ટ અને વનડેમાં સફળ રહ્યો છે, પરંતુ T20 ફોર્મેટમાં તેનો ફોર્મ નબળો રહ્યો છે. આ કારણે T20 વર્લ્ડ કપ ટીમમાં પણ તેને સ્થાન મળ્યું નહોતું.

T20માં હાર્દિકના શાનદાર આંકડા

હાર્દિક પંડ્યા T20Iમાં 2,000 રન અને 100 વિકેટ લેનારો એકમાત્ર ભારતીય ખેલાડી છે. 2025માં તેણે 153ના સ્ટ્રાઈક રેટથી 302 રન બનાવ્યા અને સાથે 12 વિકેટ ઝડપી.

આ તમામ પરિબળોને જોતા, જો 2026 T20 વર્લ્ડ કપમાં પરિણામ ભારતના પક્ષમાં ન જાય, તો હાર્દિક પંડ્યાને ફરીથી ટીમ ઇન્ડિયાની T20 કમાન સોંપવામાં આવે તેવી પૂરી શક્યતા છે.