MCX પર ઐતિહાસિક તેજી: ચાંદીમાં ₹14,005નો રેકોર્ડબ્રેક ઉછાળો, સોનું ચમક્યું

ભારતીય કોમોડિટી માર્કેટમાં સોમવારે સોના અને ચાંદીના ભાવમાં ઐતિહાસિક તેજી નોંધાઈ છે. મલ્ટી કોમોડિટી એક્સચેન્જ (MCX) પર બજાર ખુલતાની સાથે જ કિંમતી ધાતુઓના ભાવમાં મોટો ઉછાળો જોવા મળ્યો, જેમાં ચાંદીએ તો રોકાણકારોને ચોંકાવી દીધા છે.

ચાંદીના ભાવમાં વધુ જોરદાર તેજી જોવા મળી

કારોબારની શરૂઆતમાં સોનાનો ભાવ અગાઉના બંધ ભાવ ₹1,55,451ની સરખામણીએ ₹1,56,000 પર ખુલ્યો હતો અને ટૂંક સમયમાં જ ₹1,58,500ની સર્વોચ્ચ સપાટીએ પહોંચ્યો. સમાચાર લખાય ત્યાં સુધી સોનામાં અંદાજે ₹2,429 એટલે કે 1.56 ટકાનો વધારો નોંધાયો હતો, જ્યારે દિવસ દરમિયાન કુલ ઉછાળો ₹3,000થી વધુ રહ્યો. બીજી તરફ, ચાંદીના ભાવમાં વધુ જોરદાર તેજી જોવા મળી. ચાંદી અગાઉના બંધ ભાવ ₹2,49,892 સામે ₹2,59,887 પર ખુલ્યા બાદ ઉછળીને ₹2,64,885 સુધી પહોંચી ગઈ. એક જ દિવસમાં ચાંદીમાં ₹14,005નો, એટલે કે 5.60 ટકાનો વધારો નોંધાયો છે.

કિંમતી ધાતુઓની માંગમાં વધારો થયો

નિષ્ણાતોના મતે, આ તેજી પાછળ વૈશ્વિક ભૌગોલિક તણાવ, રાજકીય અનિશ્ચિતતા અને સલામત રોકાણ તરીકે સોના-ચાંદી પ્રત્યે વધતો વિશ્વાસ મુખ્ય કારણો છે. જાન્યુઆરી 2026 દરમિયાન ભારતીય ગોલ્ડ ETFમાં 98 ટકા સુધીનો વધારો થયો છે, જે દર્શાવે છે કે રોકાણકારો ભૌતિક સોનાની બદલે ડિજિટલ ગોલ્ડ તરફ વધુ વળી રહ્યા છે.

આ ઉપરાંત, અમેરિકાની ફેડરલ રિઝર્વ નીતિઓ, વ્યાજદરોમાં સંભવિત ફેરફાર અને વૈશ્વિક બજારમાં અનિશ્ચિત પરિસ્થિતિને કારણે કિંમતી ધાતુઓની માંગમાં વધારો થયો છે. એશિયામાં પણ જાન્યુઆરીમાં ગોલ્ડ ETFમાં 10 અબજ ડોલરનું રેકોર્ડબ્રેક રોકાણ નોંધાયું છે. આવનારા સમયમાં સોના અને ચાંદીના ભાવમાં તેજીનો ટ્રેન્ડ યથાવત રહે તેવી શક્યતા વ્યક્ત કરવામાં આવી રહી છે.