MCX પર ઈતિહાસ સર્જાયો: ચાંદી પ્રથમ વખત ₹3 લાખ પ્રતિ કિલો પાર, સોનાએ પણ તોડ્યો સર્વકાલીન રેકોર્ડ

અમદાવાદ | 19 જાન્યુઆરી 2026 : ભારતીય વાયદા બજાર માટે સોમવારનો દિવસ ઐતિહાસિક સાબિત થયો છે. મલ્ટી કોમોડિટી એક્સચેન્જ (MCX) પર ચાંદીના ભાવોએ પ્રથમ વખત ₹3 લાખ પ્રતિ કિલોગ્રામનો આંકડો પાર કરીને નવો સર્વકાલીન રેકોર્ડ નોંધાવ્યો છે. સાથે જ સોનાના ભાવોમાં પણ જોરદાર તેજી જોવા મળી છે અને સોનું તેની અત્યાર સુધીની સર્વોચ્ચ સપાટીએ પહોંચ્યું છે.

ચાંદીમાં2 તોફાની ઉછાળો

MCX પર 5 માર્ચ, 2026ના ચાંદીના વાયદામાં બજાર ખુલતાની સાથે જ જોરદાર ખરીદી જોવા મળી. શુક્રવારે ₹2,87,762 પર બંધ થયેલી ચાંદી સોમવારે ₹2,93,100 પર ખુલ્યા બાદ થોડી જ મિનિટોમાં ₹3,01,315 પ્રતિ કિલોની ઐતિહાસિક સપાટી સુધી પહોંચી ગઈ. હાલ ચાંદી અંદાજે ₹2,98,162 આસપાસ ટ્રેડ થઈ રહી છે. એક જ દિવસમાં ચાંદીમાં આશરે ₹10,400નો વધારો નોંધાયો છે.

બજાર નિષ્ણાતો મુજબ, ઔદ્યોગિક માંગમાં વધારો, વૈશ્વિક સપ્લાય અંગેની ચિંતા અને સલામત રોકાણ તરીકે વધતી માંગે ચાંદીના ભાવોને આ ઊંચાઈએ પહોંચાડ્યા છે.

સોનાએ પણ બનાવી નવી ઊંચાઈ

ચાંદીની સાથે સોનામાં પણ તેજી યથાવત્ રહી. MCX પર 5 ફેબ્રુઆરી, 2026ના સોનાના વાયદામાં ભાવોએ ₹1,45,500 પ્રતિ 10 ગ્રામની સર્વોચ્ચ સપાટી સ્પર્શી. શુક્રવારે ₹1,42,517 પર બંધ થયેલું સોનું આજે અંદાજે ₹1,44,454 આસપાસ ટ્રેડ થઈ રહ્યું છે.

વૈશ્વિક મોંઘવારી, ભૂરાજકીય તણાવ, ડોલરની નબળાઈ અને સેન્ટ્રલ બેન્કોના વ્યાજદર અંગેની અનિશ્ચિતતાને કારણે સોનામાં સલામત રોકાણ તરીકે ભારે માંગ જોવા મળી રહી છે.

રોકાણકારો માટે શું સંકેત?

નિષ્ણાતો માને છે કે ટૂંકા ગાળામાં કિંમતી ધાતુઓમાં અસ્થિરતા વધી શકે છે, પરંતુ લાંબા ગાળાના રોકાણકારો માટે સોનું અને ચાંદી હજી પણ મજબૂત અને સલામત વિકલ્પ છે. વૈશ્વિક અનિશ્ચિતતા ચાલુ રહે તો આવનારા દિવસોમાં પણ કિંમતી ધાતુઓ ઊંચા સ્તરે ટકીને રહે તેવી શક્યતા છે.