દાંતીવાડા પાસે ભયાનક રોડ અકસ્માત: દાંતીવાડા નજીક કારમાં આગ, બેના મોત

Dantiwada  :- વહેલી સવારે આશરે ચાર વાગ્યાના સમયે બની હતી. કાર પૂરપાટ ઝડપે દોડી રહી હતી ત્યારે ડ્રાઈવરે અચાનક વાહન પરનો કાબૂ ગુમાવ્યો હતો. પરિણામે કાર રસ્તાની બાજુમાં આવેલા ઝાડ સાથે જોરદાર અથડાઈ ગઈ હતી. આ અથડામણ એટલી જોરદાર હતી કે કારમાં તરત જ આગ લાગી ગઈ હતી અને થોડી જ પળોમાં આખી કાર સળગી ગઈ હતી. કારમાં સવાર વ્યક્તિઓને બહાર નીકળવાની કોઈ તક મળી ન હતી.

ફાયર ફાઈટર ટીમ તાત્કાલિક ઘટનાસ્થળે
સ્થાનિક લોકો દ્વારા ઘટનાની જાણ થતા જ ફાયર બ્રિગેડને જાણ કરવામાં આવી હતી. ફાયર ફાઈટર ટીમ તાત્કાલિક ઘટનાસ્થળે પહોંચી ગઈ હતી અને આગ પર કાબૂ મેળવવા પાણીનો મારો શરૂ કર્યો હતો. જોકે આગની તીવ્રતા એટલી વધારે હતી કે કાર સંપૂર્ણપણે બળી ગઈ હતી અને લોખંડના ઢાંચામાં ફેરવાઈ ગઈ હતી. આગ ઓલવવામાં સફળતા મળ્યા બાદ અંદરથી બે બળેલા મૃતદેહો બહાર કાઢવામાં આવ્યા હતા.

મૃતદેહોની ઓળખ કરવી અત્યંત મુશ્કેલ
આ બનાવને પગલે આસપાસના લોકો મોટી સંખ્યામાં ઘટનાસ્થળે એકઠા થઈ ગયા હતા. અકસ્માત એટલો ભયાનક હતો કે મૃતદેહોની ઓળખ કરવી અત્યંત મુશ્કેલ બની ગઈ છે. શરીર સંપૂર્ણપણે બળી ગયેલા હોવાથી પ્રાથમિક તબક્કે કોઈ ઓળખ શક્ય બની નથી. આ કારણે પોલીસે ટેકનિકલ પુરાવાઓ તેમજ વાહનની વિગતોના આધારે મૃતકો વિશે માહિતી મેળવવાનો પ્રયાસ શરૂ કર્યો છે.