HP Global Layoff 2025: કંપની 2028 સુધીમાં 6,000 નોકરીઓ ઘટાડશે, AI ટ્રાન્સફર્મેશન પર ફોકસ

HP Job Cuts News : વિશ્વની અગ્રણી ટેક કંપની HP Inc એ 2025માં ફરી એકવાર મોટા પાયે છટણીની જાહેરાત કરી છે. કંપનીએ સ્પષ્ટ કર્યું છે કે 2028 સુધી વૈશ્વિક સ્તરે 4,000 થી 6,000 સુધી નોકરીઓ ઘટાડવામાં આવશે. HPના જણાવ્યા મુજબ આ નિર્ણય માત્ર ખર્ચમાં કપાત નહીં,

પરંતુ AI આધારિત ટેકનોલોજી અને ઓટોમેશન તરફ ઝડપથી આગળ વધવા માટે કરવામાં આવી રહ્યો છે. ડિજિટલ ઈકોસિસ્ટમમાં પરિવર્તનને ધ્યાનમાં રાખીને કંપનીએ પોતાના ઓપરેશન્સને વધુ કાર્યક્ષમ બનાવવાનો રોડમૅપ તૈયાર કર્યો છે.

HPના CEO એનરિક લોરેસે જણાવ્યું કે આવતા ત્રણ વર્ષમાં કંપની પ્રોડક્ટ ડેવલપમેન્ટ, ટેકનિકલ સપોર્ટ, મેનેજમેન્ટ અને સર્વિસ વિભાગમાં સ્ટ્રક્ચરલ ફેરફાર કરશે. આ રાઇટ્સાઈઝિંગ પગલાં HPને લગભગ 1 બિલિયન ડોલર (રૂ. 8,300 કરોડ) બચાવવામાં મદદ કરશે. AI આધારિત સ્માર્ટ પીસી માર્કેટના વધતા પ્રભાવને કારણે પરંપરાગત માનવીય પ્રક્રિયાઓ બદલાઈ રહી છે, જે છટણીનું મુખ્ય કારણ છે.

HPના મતે નવા રિસ્ટ્રક્ચરિંગ પાછળ પાંચ મુખ્ય કારણો જવાબદાર છે—

રૂટીન કામોમાં AI ઓટોમેશનનો વધારો,

મેમરી ચિપ્સના ભાવમાં ભારે ઉછાળો,

સપોર્ટ સર્વિસિસના વધતા ખર્ચ,

ડેલ અને એસર જેવી કંપનીઓ સાથેની કઠિન સ્પર્ધા,

અને આગામી ત્રણ વર્ષમાં 1 બિલિયન ડોલર બચત કરવાનો લક્ષ્યાંક.

આ પહેલીવાર નથી જ્યારે HPએ છટણી કરી હોય. 2022–23માં કંપનીએ 4,000–6,000 નોકરીઓ ઘટાડીને 2.2 બિલિયન ડોલરની બચત કરી હતી, જ્યારે 2024ની શરૂઆતમાં પણ 2,000 કર્મચારીઓની છટણી કરવામાં આવી હતી. હાલમાં HP પાસે કુલ 58,000 કર્મચારીઓ છે, જેથી નવી છટણીનો કંપનીના સ્ટ્રક્ચર પર સીધો પ્રભાવ પડશે.

આ દરમિયાન કંપનીનો Q4 રિપોર્ટ સંતોષજનક રહ્યો છે. AI-સક્ષમ પીસી મોડલ્સ હવે HPના કુલ પીસી શિપમેન્ટના 30% છે, અને Windows 11 સાથે AI ફીચર્સના સંયોજનથી પીસી બિઝનેસમાં 8% વૃદ્ધિ નોંધાઈ છે. છતાં, AI આધારિત ડેટાસેન્ટર્સને કારણે મેમરી ચિપ્સના ભાવમાં વધારો HP, ડેલ અને એસર જેવી કંપનીઓના માર્જિન પર દબાણ ઊભું કરી રહ્યો છે.

અમેરિકન ટેરિફથી બચવા HPએ પોતાનું ઉત્પાદન ચાઇનાથી બહાર ખસેડવાનું શરૂ કર્યું છે. હવે કંપની AI-કેન્દ્રિત સપ્લાય ચેઇન અને ઓપરેશનલ મોડેલ તરફ આગળ વધી રહી છે. વૈશ્વિક ટેક સેક્ટરમાં ચાલી રહેલી છટણી વચ્ચે HPનું પગલું એ દર્શાવે છે કે AI ટેકનોલોજી ઉદ્યોગમાં ઓછા લોકો સાથે વધુ કાર્યક્ષમતા તરફનું ભવિષ્ય બનાવી રહી છે.