IND vs SA T20 Match: નરેન્દ્ર મોદી સ્ટેડિયમમાં મેચ માટે મેટ્રો સેવા મધ્યરાત્રિ 12:30 સુધી, GMRCનો મોટો નિર્ણય

IND vs SA T20 Match Ahmedabad: અમદાવાદના નરેન્દ્ર મોદી સ્ટેડિયમ ખાતે 19 ડિસેમ્બર 2025ના રોજ ભારત અને સાઉથ આફ્રિકા વચ્ચે ડે-નાઈટ T20 મેચ રમાનારી છે. આ હાઈ-વોલ્ટેજ મુકાબલો જોવા આવનારા હજારો ક્રિકેટપ્રેમીઓને મોડી રાત્રે ઘરે પરત ફરવામાં કોઈ મુશ્કેલી ન પડે તે માટે ગુજરાત મેટ્રો રેલ કોર્પોરેશન (GMRC)એ મહત્વપૂર્ણ નિર્ણય લીધો છે.

GMRC દ્વારા મેચના દિવસે અમદાવાદ મેટ્રો સેવાઓની સમયમર્યાદા લંબાવીને મધ્યરાત્રિના 12:30 વાગ્યા સુધી કરવામાં આવી છે. નિયમિત રીતે મેટ્રો સેવા સવારે 6:20થી રાત્રે 10:00 વાગ્યા સુધી ચાલે છે, પરંતુ આ મેચને ધ્યાનમાં રાખીને વધારાની લેટ-નાઇટ સેવા આપવામાં આવશે.

મેચ પૂર્ણ થયા બાદ રાત્રે 10:00થી 12:30 વાગ્યા સુધીના સમયગાળામાં માત્ર મોટેરા સ્ટેડિયમ અને સાબરમતી મેટ્રો સ્ટેશન પરથી જ મુસાફરોને એન્ટ્રી મળશે. અહીંથી મુસાફરો એપીએમસી (વાસણા) અને વસ્ત્રાલ ગામ – બંને કોરિડોરના કોઈપણ કાર્યરત સ્ટેશન સુધી જઈ શકશે.

ગાંધીનગર તરફ જતા ક્રિકેટપ્રેમીઓ માટે પણ GMRCએ ખાસ વ્યવસ્થા કરી છે. મોટેરા સ્ટેડિયમથી ગાંધીનગર સેક્ટર-1 સુધી બે સ્પેશિયલ મેટ્રો ટ્રેનો દોડાવવામાં આવશે, જે અનુક્રમે રાત્રે 11:40 અને 12:10 વાગ્યે ઉપડશે.

ભીડ ટાળવા માટે GMRCએ ₹50ના ફ્લેટ રેટ પર સ્પેશિયલ પેપર ટિકિટ પણ રજૂ કરી છે. આ ટિકિટથી મુસાફરો મોટેરા અથવા સાબરમતીથી મેટ્રોના કોઈપણ સ્ટેશન સુધી મુસાફરી કરી શકશે. નોંધનીય છે કે રાત્રે 10:00 વાગ્યા બાદ મોબાઈલ એપ, QR ટિકિટ કે ટોકન માન્ય રહેશે નહીં — પ્રવેશ માટે માત્ર આ સ્પેશિયલ પેપર ટિકિટ જ જરૂરી રહેશે.

પ્રેક્ષકો લાંબી લાઈનોમાંથી બચી શકે તે માટે આ સ્પેશિયલ પેપર ટિકિટો નિરાંત ક્રોસ રોડ, કાલુપુર, ઓલ્ડ હાઇકોર્ટ, થલતેજ, મોટેરા, સાબરમતી, રાણીપ, વાડજ, જીવરાજ પાર્ક, GNLU, ઇન્ફોસિટી અને ગાંધીનગર સેક્ટર-1 સહિતના મુખ્ય સ્ટેશનો પરથી એડવાન્સમાં ખરીદી શકાશે. આ ટિકિટ આખો દિવસ માન્ય રહેશે.

GMRCના સમયપત્રક મુજબ, મોટેરા સ્ટેડિયમથી એપીએમસી તરફની છેલ્લી ટ્રેન 12:30 વાગ્યે, જ્યારે ગાંધીનગર સેક્ટર-1 તરફની છેલ્લી ટ્રેન 12:10 વાગ્યે રવાના થશે. નાગરિકોને સમયમર્યાદાનું ધ્યાન રાખીને સ્ટેશન પર પહોંચવા અપીલ કરવામાં આવી છે.