ICC રેન્કિંગમાં ભારતીય ખેલાડીઓનો દબદબો: Jasprit Bumrah ટોપ-5માં પરત, Abhishek Sharma નંબર-1 યથાવત

ભારતીય ફાસ્ટ બોલર જસપ્રીત બુમરાહ હવે 702 રેટિંગ પોઈન્ટ સાથે વિશ્વનો પાંચમા નંબરનો T20 બોલર બની ગયો છે. રસપ્રદ વાત એ છે કે, બુમરાહે આ સ્થાન મેદાન પર ઉતર્યા વગર જ મેળવ્યું છે. દક્ષિણ આફ્રિકાના કોર્બિન બોશને ન્યૂઝીલેન્ડ સામેની શ્રેણીમાં ટીમમાં સ્થાન ન મળતા તેના રેન્કિંગમાં ઘટાડો થયો છે, જેનો સીધો ફાયદો બુમરાહને થયો છે. ઉલ્લેખનીય છે કે, T20 વર્લ્ડ કપની ફાઇનલમાં બુમરાહ ‘પ્લેયર ઓફ ધ મેચ’ રહ્યો હતો.

દરમિયાન, ન્યૂઝીલેન્ડના કેપ્ટન મિશેલ સેન્ટનરે બોલિંગ રેન્કિંગમાં જબરદસ્ત પ્રદર્શન કર્યું છે. દક્ષિણ આફ્રિકા સામેની શ્રેણીમાં શાનદાર રમત બતાવતા સેન્ટનર 11 સ્થાનની છલાંગ લગાવીને 24મા ક્રમેથી સીધો 13મા સ્થાને પહોંચી ગયો છે. ઓલરાઉન્ડરોની યાદીમાં પણ સેન્ટનર બે સ્થાનના સુધારા સાથે સાતમા ક્રમે (કારકિર્દીનું શ્રેષ્ઠ રેન્કિંગ) પહોંચી ગયો છે.

બેટ્સમેનોની T20 રેન્કિંગમાં ભારતીય ખેલાડીઓનું શાસન ચાલુ છે. અભિષેક શર્મા 875 રેટિંગ પોઈન્ટ સાથે જુલાઈ 2025થી સતત નંબર વન સ્થાને બિરાજમાન છે. બીજા ક્રમે પણ ભારતનો જ ઇશાન કિશન છે, જે અભિષેક કરતા માત્ર ચાર પોઈન્ટ પાછળ છે. ન્યૂઝીલેન્ડના ડેવોન કોનવેએ પણ ચાર સ્થાનના સુધારા સાથે 70મું સ્થાન મેળવ્યું છે. ઓલરાઉન્ડરોની યાદીમાં સેન્ટનર સિવાય અન્ય કોઈ મોટા ફેરફાર જોવા મળ્યા નથી.