યુરોપમાં ભારતના એક્સપોર્ટમાં નોંધપાત્ર વધારો, સ્પેન બન્યું સૌથી ઝડપી વિકસતું બજાર

વાણિજ્ય મંત્રાલયના તાજેતરના અહેવાલ મુજબ, યુરોપિયન દેશોમાં ભારતના એક્સપોર્ટમાં મજબૂત વૃદ્ધિ નોંધાઈ છે, જે ભારતની વૈવિધ્યસભર અને લાંબા ગાળાની એક્સપોર્ટ વ્યૂહરચનાનો સ્પષ્ટ પુરાવો છે. યુરોપિયન યુનિયનના 27 દેશોમાંથી સ્પેન, જર્મની, બેલ્જિયમ અને પોલેન્ડ ભારત માટે મહત્વના વેપારી ભાગીદાર તરીકે ઉભરી આવ્યા છે.

સ્પેનમાં 56% ઉછાળો

એક્સપોર્ટ વૃદ્ધિની દ્રષ્ટિએ સ્પેન ભારત માટે સૌથી ઝડપી વિકસતું યુરોપિયન બજાર બન્યું છે. ચાલુ નાણાકીય વર્ષના એપ્રિલથી નવેમ્બર દરમિયાન સ્પેનમાં ભારતની એક્સપોર્ટમાં 56 ટકાનો વધારો નોંધાયો છે. ગયા વર્ષે આ સમયગાળામાં 3 અબજ ડોલરની એક્સપોર્ટ હવે વધીને 4.7 અબજ ડોલર પર પહોંચી છે. ભારતની કુલ એક્સપોર્ટમાં સ્પેનનો હિસ્સો હવે 2.4 ટકા થયો છે.

જર્મની, બેલ્જિયમ અને પોલેન્ડમાં પણ મજબૂત માંગ

યુરોપની સૌથી મોટી અર્થવ્યવસ્થા જર્મનીમાં ભારતની એક્સપોર્ટ 9.3 ટકા વધીને 7.5 અબજ ડોલર થઈ છે, જેમાં કુલ એક્સપોર્ટમાં તેનો હિસ્સો 2.6 ટકા છે.

બેલ્જિયમમાં એક્સપોર્ટ 4.4 અબજ ડોલર સુધી પહોંચી છે, જ્યારે પોલેન્ડમાં 7.6 ટકા વધારા સાથે એક્સપોર્ટ 1.82 અબજ ડોલર નોંધાઈ છે. આ આંકડાઓ દર્શાવે છે કે ભારત હવે પરંપરાગત બજારો પર નિર્ભર નથી રહ્યો.

EU ભારતનો સૌથી મોટો વેપારી ભાગીદાર

નિષ્ણાતો મુજબ, યુરોપમાં વિસ્તરણથી ભારતીય એક્સપોર્ટર્સને Risk Diversification અને નવા અવસરો મળી રહ્યા છે, ખાસ કરીને MSME ક્ષેત્ર માટે. વર્ષ 2024-25 દરમિયાન ભારત-EU વચ્ચેનો કુલ વેપાર 136.53 અબજ ડોલર રહ્યો હતો, જેના કારણે EU ભારતનો સૌથી મોટો વેપારી ભાગીદાર બન્યો છે. ભારતની કુલ એક્સપોર્ટમાં EU બજારનો હિસ્સો અંદાજે 17 ટકા છે.

જો ભારત-EU મુક્ત વ્યાપાર કરાર (FTA) અમલમાં આવશે, તો રેડીમેડ ગારમેન્ટ્સ, ફાર્માસ્યુટિકલ્સ, સ્ટીલ, પેટ્રોલિયમ ઉત્પાદનો અને ઇલેક્ટ્રિકલ મશીનરી જેવા ક્ષેત્રોને યુરોપિયન બજારમાં મોટો ફાયદો મળી શકે છે.