Indigo Airlines Trouble: 4500 ફ્લાઇટ રદ બાદ ભારે દંડની ચર્ચા

ઇન્ડિગો એરલાઇન્સ છેલ્લા કેટલાક દિવસોથી ચાલતી ફ્લાઇટ રદ અને લાંબા વિલંબને કારણે ગંભીર સંકટમાં છે. મુસાફરોની વધતી ફરિયાદો અને સોશિયલ મીડિયા પર ઉઠેલા પ્રચંડ આક્રોશને ધ્યાનમાં રાખીને નાગરિક ઉડ્ડયન મંત્રાલય (MoCA) હવે એરલાઇન સામે 1,000 કરોડ રૂપિયા સુધીનો દંડ લાદવાની ગંભીર ચર્ચા કરી રહ્યું છે. ભારતીય એવિએશન ઇતિહાસમાં આ સૌથી મોટું પેનલ્ટી બની શકે છે.

DGCA દ્વારા અગાઉથી જ કાર્યક્ષમતા સંબંધિત ખામીઓ અંગે ઇન્ડિગોને અનેક ચેતવણીઓ આપવામાં આવી હતી. સુધારો ન થતા MoCAએ એરલાઇનને વિન્ટર શેડ્યૂલમાં કરેલા વધારા પાછા ખેંચવા અને કુલ ઓપરેશન્સમાં 5% કટ કરવાનો આદેશ આપ્યો છે. આથી ઇન્ડિગોને સ્ટાફિંગ, જાળવણી અને ફ્લાઇટ મેનેજમેન્ટમાં તાત્કાલિક સુધારો કરવો પડશે.

સરકાર એક સંસદીય સમિતિ રચવાની પણ વિચારણા કરી રહી છે, જે ઇન્ડિગોની ઓપરેશનલ નીતિઓ, માનવશક્તિ સંચાલન અને મુસાફર સુવિધાઓ પ્રત્યેના વલણની તલસ્પર્શી તપાસ કરશે. સમિતિની ભલામણો પછી વધુ કડક પગલાં પણ લેવાઈ શકે છે.

છેલ્લા એક અઠવાડિયામાં 4,500થી વધુ ફ્લાઇટ્સ રદ થઈ છે, જ્યારે માત્ર એક જ દિવસે 500 જેટલી ફ્લાઇટ બંધ રહી. મુસાફરોને ભારે અસુવિધા થતા એરલાઇનને અત્યાર સુધી 745 કરોડ રૂપિયાનું રિફંડ આપવા પડ્યું છે, જે તેની નાણાકીય સ્થિતિને આંચકો પહોંચાડે છે.

ભારતના હવાઈપરિવહન ક્ષેત્રમાં 60% માર્કેટ શેર ધરાવતી ઇન્ડિગોની આ પરિસ્થિતિએ સમગ્ર એવિએશન સિસ્ટમની કાર્યક્ષમતાને લઈને ગંભીર પ્રશ્નો ઊભા કર્યા છે. આવતા દિવસોમાં સરકારનો વધુ સખ્ત વલણ જોવા મળી શકે છે.