IPL 2026 છેલ્લી સીઝન? MS Dhoni સહિત આ દિગ્ગજો લઈ શકે છે સંન્યાસ

IPL 2026 : – સીઝનની પ્રથમ મેચ બેંગલુરુના એમ. ચિન્નાસ્વામી સ્ટેડિયમ ખાતે રોયલ ચેલેન્જર્સ બેંગ્લોર (RCB) અને સનરાઇઝર્સ હૈદરાબાદ (SRH) વચ્ચે રમાશે. ભારતીય ક્રિકેટ કંટ્રોલ બોર્ડ (BCCI) એ હાલમાં પ્રથમ 20 મેચોનું જ શેડ્યૂલ જાહેર કર્યું છે, જ્યારે બાકીની મેચોની વિગતો ટૂંક સમયમાં જાહેર કરવામાં આવશે. જોકે, આ સીઝન ચાહકો માટે જેટલી રોમાંચક છે, તેટલી જ ભાવનાત્મક પણ બની શકે છે. અહેવાલો મુજબ, આ 5 દિગ્ગજ ખેલાડીઓ માટે IPL 2026 તેમની કારકિર્દીની છેલ્લી સીઝન સાબિત થઈ શકે છે.

1. મહેન્દ્ર સિંહ ધોની
IPL ના ઇતિહાસમાં સૌથી સફળ કેપ્ટન ગણાતા મહેન્દ્ર સિંહ ધોની પર સૌની નજર રહેશે. જુલાઈ 2026 માં ધોની 45 વર્ષના થશે. વધતી ઉંમર અને ઘૂંટણની ઈજા છતાં ધોનીએ ગયા વર્ષે મેદાનમાં જે રીતે હેલિકોપ્ટર શોટ્સ ફટકાર્યા હતા તે કાબિલ-એ-તારીફ હતા. CSK ના CEO કાસી વિશ્વનાથને સ્પષ્ટ કર્યું છે કે ‘થલા’ આખી સીઝન રમશે. પરંતુ, ભવિષ્યના રોડમેપને જોતા એવું મનાય છે કે ધોની આ વખતે હોમ ગ્રાઉન્ડ પર ચેન્નાઈના ચાહકોને અંતિમ વિદાય આપી શકે છે.

2. સુનિલ નારાયણ
કેરેબિયન બોલિંગ ઓલરાઉન્ડર સુનિલ નારાયણ KKR માટે વર્ષો સુધી ‘ટ્રમ્પ કાર્ડ’ રહ્યો છે. 192 વિકેટ અને 1,780 રન સાથે તે લીગનો શ્રેષ્ઠ ઓલરાઉન્ડર સાબિત થયો છે. મે મહિનામાં 38 વર્ષના થનારા નારાયણે આંતરરાષ્ટ્રીય ક્રિકેટને પહેલેથી જ અલવિદા કહી દીધું છે. હવે વધતી ઉંમર અને ફિટનેસના પ્રશ્નોને કારણે, IPL 2026 એ આ વિસ્ફોટક ઓપનર અને મિસ્ટ્રી સ્પિનર તરીકે તેની છેલ્લી સફર બની શકે છે.

3. ઇશાંત શર્મા
ભારત માટે 100 થી વધુ ટેસ્ટ રમનાર અનુભવી ફાસ્ટ બોલર ઇશાંત શર્મા હાલમાં ગુજરાત ટાઇટન્સનો ભાગ છે. 37 વર્ષીય ઇશાંત લાંબા સમયથી ટીમ ઇન્ડિયાની બહાર છે. યુવા ફાસ્ટ બોલરોની વધતી ભીડ અને તેની પોતાની ફિટનેસને જોતા, ઇશાંત માટે આ સીઝન નિવૃત્તિનો માર્ગ મોકળો કરી શકે છે. સાત અલગ-અલગ ટીમો માટે રમી ચૂકેલા આ બોલરનું કરિયર હવે અંતિમ પડાવ પર હોવાનું જણાય છે.

4. અજિંક્ય રહાણે
ટેકનિકલી મજબૂત અને 5,000 થી વધુ રન બનાવનાર અજિંક્ય રહાણે આ સીઝનમાં ફરી એકવાર KKR નું નેતૃત્વ કરી શકે છે. ગયા વર્ષે કોલકાતા તેની કેપ્ટનશીપ હેઠળ આઠમા ક્રમે રહ્યું હતું. જૂન મહિનામાં રહાણે 38 વર્ષનો થશે. યુવા અને ફાસ્ટ ક્રિકેટના આ યુગમાં રહાણે માટે આગામી સીઝન પછી ટીમમાં સ્થાન જાળવી રાખવું મુશ્કેલ બની શકે છે, જેના કારણે તે નિવૃત્તિની જાહેરાત કરી શકે છે.

5. મિચેલ સ્ટાર્ક
ઓસ્ટ્રેલિયાનો ખતરનાક ડાબોડી ફાસ્ટ બોલર મિચેલ સ્ટાર્ક હવે દિલ્હી કેપિટલ્સના રંગમાં જોવા મળશે. T20 આંતરરાષ્ટ્રીય ક્રિકેટમાંથી નિવૃત્તિ લીધા બાદ સ્ટાર્કનું સંપૂર્ણ ધ્યાન ટેસ્ટ અને ODI પર છે. પોતાના આંતરરાષ્ટ્રીય વર્કલોડને મેનેજ કરવા માટે સ્ટાર્ક IPL જેવી લાંબી ટૂર્નામેન્ટમાંથી બ્રેક લઈ શકે છે અથવા કાયમી ધોરણે નિવૃત્તિ લઈ શકે છે. ચાહકો માટે સ્ટાર્કને લાલ અને વાદળી જર્સીમાં ઘાતક યોર્કર ફેંકતો જોવાની આ છેલ્લી તક હોઈ શકે છે. આ પાંચેય દિગ્ગજોએ IPL ને પોતાના પ્રદર્શનથી સમૃદ્ધ બનાવ્યું છે. હવે જોવાનું એ રહેશે કે શું તેઓ પોતાની અંતિમ સીઝનમાં પોતાની ટીમને ટ્રોફી અપાવીને ગૌરવપૂર્ણ વિદાય લઈ શકે છે કે નહીં.