IPL 2026 અપડેટ: રાજસ્થાન રોયલ્સ અને ચેન્નાઈ સુપર કિંગ્સ વચ્ચે રેકોર્ડ બ્રેકિંગ સ્વેપ જાડેજા RRમાં અને સંજૂ સેમસન CSKમાં, ફેન્સમાં જોરદાર ચર્ચા

ઇન્ડિયન પ્રીમિયર લીગ (IPL) 2026ને લઈને છેલ્લા કેટલાક દિવસોથી ચાલી રહેલા અનુમાન અને ચર્ચાઓને વિરામ આપતાં, લીગ મેનેજમેન્ટે સોમવારે કેટલાક મોટા અને અસરકારક ટ્રેડ્સની સત્તાવાર જાહેરાત કરી છે.

રીટેન્શન માટે નક્કી કરેલી સાંજે 5 વાગ્યાની અંતિમ સમયસીમા પહેલા બહાર પાડવામાં આવેલી પ્રેસ રિલીઝમાં, આવનારા ઓક્શન પહેલાં ફ્રેન્ચાઇઝીઓ વચ્ચે થયેલા તમામ કન્ફર્મ ટ્રેડ્સની વિગત આપવામાં આવી હતી.

ખાસ કરીને, બે મહત્ત્વના ભારતીય સ્ટાર ખેલાડીઓ રવીન્દ્ર જાડેજા અને સંજુ સેમસન વચ્ચે થયેલું હાઈ-પ્રોફાઇલ સ્વેપ સીઝનનો સૌથી મોટો હેડલાઇનર બન્યું છે.

• જાડેજા–સેમસન સ્વેપ: સીઝનની સૌથી મોટી હિલચાલ

ચેન્નઈ સુપર કિંગ્સ (CSK) સાથે લાંબા સમયથી જોડાયેલા અને ટીમના અભિન્ન હિસ્સા માનાતા ઓલરાઉન્ડર રવીન્દ્ર જાડેજાનો રાજસ્થાન રોયલ્સ (RR) તરફ ટ્રેડ હવે સત્તાવાર રીતે પુષ્ટિ પામ્યો છે. આ ટ્રેડ સાથે જાડેજાની લીગ ફી 18 કરોડથી ઘટીને 14 કરોડ નક્કી કરવામાં આવી છે.

બીજી બાજુ, રાજસ્થાન રોયલ્સના કેપ્ટન સંજુ સેમસન હવે CSKની જર્સીમાં દેખાશે. સેમસનને તેમની હાલની 18 કરોડની જ ફીમાં ચેન્નઈએ ટ્રેડ દ્વારા મેળવ્યો છે. આ હાઈ-વેલ્યુ સ્વેપ આવનારે સીઝનમાં બંને ટીમોની કમ્બિનેશનમાં મોટા ફેરફાર કરશે એવો અંદાજ છે.

પ્રેસ રિલીઝ અનુસાર, CSKએ તેમના વિદેશી ઓલરાઉન્ડર સેમ કરનને પણ RRમાં સ્વેપ કર્યો છે, જે માટે રાજસ્થાન 2.4 કરોડ ચૂકવશે. કરન, જે ડેથ ઓવર્સમાં મહત્ત્વની ભૂમિકા ભજવે છે, રાજસ્થાન માટે એક નવો બેલેન્સિંગ ફેક્ટર બની શકે છે.