છેલ્લા 24 કલાકમાં રાજ્યમાં મેઘરાજાની ધમાકેદાર બેટિંગ, નડિયાદમાં 11 ઈંચ વરસાદ ખાબક્યો
રાજ્યમાં 16 જૂને થયેલી ચોમાસાની એન્ટ્રી બાદ અત્યાર સુધીમાં મેઘરાજાએ સમગ્ર ગુજરાતને કવર કરી લીધું છે. હવામાન વિભાગ દ્વારા આગામી 7 દિવસ રાજ્યમાં ભારે વરસાદની આગાહી કરાઈ છે.
રાજ્યમાં અપર એર સાઈક્લોનિક સર્ક્યુલેશન સિસ્ટમ સક્રિય થઈ છે અને ટ્રફ લાઈન પણ પસાર થઈ રહી છે. આ સિવાય વેલમાર્ક લો પ્રેશર સિસ્ટમ પણ સક્રિય થવાથી રાજ્યમાં સાર્વત્રિક ભારેથી અતિ ભારે વરસાદની આગાહી કરવામાં આવી છે.
ગાજવીજ સાથે વરસાદની શક્યતા
આગામી 5 દિવસ 30 થી 40 કિમી પ્રતિ કલાકની ઝડપે પવન ફૂંકાશે. ગાજવીજ સાથે વરસાદની શક્યતા છે. આગામી 5 દિવસ માછીમારો માટે દરિયો ન ખેડવા સૂચના આપવામાં આવી છે.
દરમિયાન, ઉપરવાસમાંથી ભારે વરસાદથી પાણીની આવક વધતા ધરોઈ ડેમના દરવાજા ખોલવા પડે એવી સ્થિતિ સર્જાઈ છે. ત્યારે અમદાવાદમાં સવારથી વરસાદી માહોલ છે. વિઝિબિલિટી ઘટી જતા વાહનચાલકોને ફરજિયાત હેડલાઈટ ચાલુ કરવી પડી રહી છે.
રાજ્યના 198 તાલુકામાં વરસાદ નોંધાયો
છેલ્લા 24 કલાકમાં રાજ્યના 198 તાલુકામાં વરસાદ નોંધાયો હતો, જેમાં ખેડાના નડિયાદમાં 11 ઈંચ, અમદાવાદના દસ્ક્રોઈમાં 10 ઈંચ, ખેડાના મહેમદાવાદમાં 9 ઈંચ અને માતરમાં 8 ઈંચ વરસાદ ખાબક્યો હતો. સમગ્ર ખેડા જિલ્લામાં 3 ઈંચથી લઈને 11 ઈંચ સુધી વરસાદ ખાબક્યો હતો.
આ જિલ્લાઓમાં રેડ અને ઓરેન્જ એલર્ટ
આજે એટલે કે 28 જુલાઈના રોજ બનાસકાંઠા સાબરકાંઠા અને અરવલ્લીમાં છૂટાછવાયાં સ્થળોએ ભારેથી અતિભારે વરસાદને લઈને ઓરેન્જ એલર્ટ આપવામાં આવ્યું છે.
જ્યારે પાટણ, મહેસાણા, ગાંધીનગર, સુરેન્દ્રનગર, અમદાવાદ, રાજકોટ, બોટાદ, અમરેલી, ભાવનગર, ખેડા, આણંદ, મહીસાગર, દાહોદ, પંચમહાલ, વડોદરા, છોટાઉદેપુર, ભરૂચ, નર્મદા, સુરત, નવસારી, વલસાડ, દમણ અને દાદરા નગર હવેલીમાં ભારે વરસાદને લઈને યેલો એલર્ટ આપવામાં આવ્યું છે.
