બેંગલુરુમાં કાળમુખી કારનો કહેર: મોલ બહાર ફૂટપાથ પર સાત રાહદારીઓને કચડ્યા

Bengaluru Road Accident: કર્ણાટકની રાજધાની બેંગલુરુમાં બુધવારે સાંજના સમયે એક ભયાનક માર્ગ અકસ્માત સર્જાયો હતો. શહેરના જાણીતા ફીનિક્સ મોલ ઑફ એશિયા બહાર પૂરઝડપે દોડી રહેલી એક કાર અચાનક બેકાબૂ બની ફૂટપાથ પર ચઢી ગઈ હતી. આ ઘટનામાં ફૂટપાથ પર ચાલતા અને ઊભેલા સાત રાહદારીઓ ગંભીર રીતે ઈજાગ્રસ્ત થયા હોવાના અહેવાલો છે.

પ્રત્યક્ષદર્શીઓ મુજબ, કારની ઝડપ અત્યંત વધારે હતી, જેના કારણે રાહદારીઓને બચવાની કોઈ તક મળી નહોતી. અકસ્માત બાદ સ્થળ પર ભારે અફરાતફરી મચી ગઈ હતી. સમગ્ર ઘટનાના CCTV ફૂટેજ સોશિયલ મીડિયા પર વાયરલ થઈ રહ્યા છે.

અકસ્માતની જાણ થતાં જ સ્થાનિક લોકો અને મોલના સુરક્ષા કર્મચારીઓ દોડી આવ્યા હતા. ઈજાગ્રસ્તોને તાત્કાલિક નજીકની હોસ્પિટલમાં ખસેડવામાં આવ્યા, જ્યાં ડૉક્ટરોની ટીમ તેમની સારવારમાં વ્યસ્ત છે. કેટલાકની હાલત ગંભીર હોવાનું જણાવાયું છે.

પોલીસે ઘટનાસ્થળે પહોંચી કારને જપ્ત કરી છે અને ડ્રાઇવર વિરુદ્ધ બેદરકારીપૂર્વક અને ઝડપી ડ્રાઇવિંગનો ગુનો નોંધ્યો છે. ડ્રાઇવર નશાની હાલતમાં હતો કે કેમ તે જાણવા માટે બ્લડ સેમ્પલ તપાસ માટે મોકલવામાં આવ્યો છે.

આ ઘટનાએ ફરી એકવાર બેંગલુરુમાં વધતા માર્ગ અકસ્માતો, સ્પીડ કંટ્રોલ અને રાહદારીઓની સુરક્ષા અંગે ગંભીર પ્રશ્નો ઊભા કર્યા છે. સ્થાનિક નાગરિકોમાં ભારે રોષ જોવા મળી રહ્યો છે અને ફૂટપાથ સુરક્ષા માટે કડક પગલાં લેવાની માંગ ઉઠી છે.