મૈનપુરીમાં કાળમુખી દુર્ઘટના: દિવાલ અને ટીન શેડ તૂટી પડતાં 2 બાળકો સહિત 3ના મોત

Mainpuri  : ઉત્તર પ્રદેશના મૈનપુરી જિલ્લાના કુરાવલી પોલીસ સ્ટેશન વિસ્તાર હેઠળના જટપુરા ગામમાં મંગળવારની રાત્રે એક હૃદયદ્રાવક અકસ્માત સર્જાયો છે. રાત્રિના સમયે ગાઢ નિદ્રામાં સૂતેલા એક પરિવાર પર કાચી માટીની દિવાલ અને તેની પરનો ટીન શેડ અચાનક ધરાશાયી થતાં બે બાળકો અને એક મહિલાનું કાટમાળ નીચે દટાઈ જવાથી કરુણ મોત નીપજ્યું છે, જ્યારે પરિવારના અન્ય ત્રણ સભ્યો ગંભીર રીતે ઘાયલ થયા છે.

ઘટનાની વિગતો મુજબ, ગામના રહેવાસી બ્રિજેશ કુમાર જાટવ મંગળવારે રાત્રે અંદાજે 11 વાગ્યાના સુમારે પોતાની પત્ની અને ચાર બાળકો સાથે ઘરની માટીની દિવાલને અડીને બનાવેલા ટીન શેડ નીચે સૂતા હતા. અચાનક માટીની દિવાલ નબળી પડીને ધરાશાયી થઈ હતી, જેની સાથે ભારેભરખમ ટીન શેડ પણ નીચે સૂતેલા પરિવાર પર તૂટી પડ્યો હતો. કાટમાળ નીચે આખો પરિવાર દટાઈ જતાં ગામમાં ચીસાચીસ મચી ગઈ હતી.

ધડાકાભેર દિવાલ પડવાનો અવાજ સાંભળીને આસપાસના ગ્રામજનો તાત્કાલિક ઘટનાસ્થળે દોડી આવ્યા હતા. લોકોએ ભારે જહેમત બાદ કાટમાળ નીચે દટાયેલા તમામ સભ્યોને બહાર કાઢ્યા હતા. જોકે, હોસ્પિટલ પહોંચતા પહેલા જ બ્રિજેશ કુમારની 40 વર્ષીય પત્ની રૂબી, 13 વર્ષની પુત્રી બેબી (દેવી) અને 8 વર્ષના માસૂમ પુત્ર દિલીપ કુમારના શ્વાસ થંભી ગયા હતા. ડોક્ટરોએ આ ત્રણેયને મૃત જાહેર કર્યા હતા. આ અકસ્માતમાં બ્રિજેશ કુમાર પોતે અને તેમની બે પુત્રીઓ – 15 વર્ષીય ગુડિયા અને 5 વર્ષની પલ્લવી ગંભીર રીતે ઘાયલ થયા છે. તમામને સારવાર અર્થે કુરાવલી સામુદાયિક આરોગ્ય કેન્દ્રમાં દાખલ કરવામાં આવ્યા છે.