જાણો કેવી છે પ્રિયંકાની ‘ધ બ્લફ’ ; હોલિવૂડમાં દેશી ગર્લનો ખતરનાક એક્શન અંદાજ

દેશી ગર્લ પ્રિયંકા ચોપરા “ધ બ્લફ” માં જે અવતારમાં જોવા મળે છે, તે ઘણા પુરુષ કલાકારો માટે પણ સપનાનું પાત્ર હોઈ શકે છે. ફિલ્મમાં પ્રિયંકા કેટલાક લોકોને ખંજર-તલવારથી કાપી નાખે છે, કેટલાકને જીવતા સળગાવી દે છે અને ઘણા લોકોને તો સીધા બોમ્બથી ઉડાવી દે છે. હા, એકાદ વાર તમને વિચાર આવી શકે કે તેમને મારવા આવેલા મધ્યમ કદના પાઇરેટ જહાજમાં આટલા બધા માણસો સમાઈ કેવી રીતે ગયા! પણ આ બધું થોડું બાજુએ રાખીએ. જ્યારે પ્રિયંકા એટલી જબરદસ્ત એક્શનબાજી સાથે અલ્ટિમેટ પાઇરેટ અવતારમાં દેખાય છે, ત્યારે કેટલા લોકો કપાઈ રહ્યા છે એનો શું ફરક પડે? આવવા દો!

એક ટાપુ, એક પાઇરેટ અને એક પરિવાર

પાઇરેટ કેપ્ટન કોનર (કાર્લ અર્બન) સમુદ્રમાં દેખાયેલા એક અજાણ્યા જહાજ પર કબજો કરી લે છે. તે જહાજના કેપ્ટન ટી. એચ. બોડેન (ઇસ્માઈલ ક્રૂઝ કોર્ડોવા) પાસેથી કોનરને સોનાની એક બિસ્કિટ મળે છે. વર્ષો પહેલા, કોનરના એક પાઇરેટ સાથીએ બગાવત કરી હતી અને સોનાથી ભરેલું બોક્સ લઈને ભાગી ગયો હતો.બોડેન પાસે મળેલી બિસ્કિટ એ જ બોક્સમાંથી છે. વર્ષોથી પોતાનો ખજાનો અને ગદ્દાર સાથી શોધતો કોનર હવે તે ટાપુ તરફ વધે છે, જ્યાં બોડેનનું ઘર છે.

બોડેનની પત્નીના રોલમાં જોવા મળશે પ્રિયંકા

ઘરમાં બોડેનની બહેન છે અને તેનો એક વિકલાંગ દીકરો છે. તેમને સંભાળી રહી છે બોડેનની પત્ની એરસેલ (પ્રિયંકા ચોપરા). કોનરની ટોળકીનો પહેલું જૂથ જ્યારે તેમને પકડવા આવે છે, ત્યારે માત્ર દસ જ મિનિટમાં તેમને સમજાઈ જાય છે કે, એરસેલને માત્ર એક ઘરવાળી સમજવી તેમની કેટલી મોટી ભૂલ હતી. ભૂલો તો સુધારી શકાય, પણ તેના માટે જીવતા હોવું જરૂરી છે. ઈશ્વર તેમની આત્માને શાંતિ આપે.

“ધ બ્લફ” નામ કેમ રાખવામાં આવ્યું?

કોનરની ટોળકી જલદી જ જાણશે કે એરસેલ કોણ છે, શું કરી શકે છે અને કેટલી હદ સુધી જઈ શકે છે. તેમની ઉપર વરસનાર આ ‘જ્ઞાનવર્ષા’ સ્ટાઇલિશ, ધારદાર એક્શન અને મોટા પડદા જેવી હીરોગીરીનું શાનદાર પ્રદર્શન છે. અહીં ‘બ્લફ’ ભૂગોળનો શબ્દ છે. દરિયાઈ મોજાંઓના ધોવાણથી દરિયા કિનારામાં ગુફાઓ જેવી ખાલી જગ્યાઓ સર્જાય છે. બોડેન ટાપુ પર આવા જ એક “બ્લફ” દ્વારા કોનરની ગેંગનો શિકાર કરવામાં આવે છે. તેથી ફિલ્મનું શીર્ષક, “ધ બ્લફ” રાખવામાં આવ્યું છે.