રાયપુરમાં આજે ભારત-ન્યૂઝીલેન્ડ વચ્ચે બીજી ટી-20 મેચ, જાણો બંને ટીમની સંભવિત પ્લેઇંગ ઇલેવન

ભારત અને ન્યૂઝીલેન્ડ વચ્ચે ચાલી રહેલી પાંચ મેચોની T20 સિરીઝનો બીજો મુકાબલો આજે રાયપુરના શહીદ વીર નારાયણ સિંહ સ્ટેડિયમમાં રમાશે. પ્રથમ મેચમાં શાનદાર જીત સાથે ટીમ ઈન્ડિયા હાલ સિરીઝમાં 1-0થી આગળ છે અને આજે જીત મેળવીને કિવીઝ પર માનસિક દબાણ વધારવાના ઇરાદે મેદાને ઉતરશે.

મેચનો ટોસ સાંજે 6:30 વાગ્યે થશે જ્યારે મુકાબલો રાત્રે 7 વાગ્યે શરૂ થશે. સ્ટાર ઓલરાઉન્ડર અક્ષર પટેલ પ્રથમ મેચ દરમિયાન ઈજાગ્રસ્ત થતા આજે તેની રમવાની શક્યતા ઓછી છે. તેના સ્થાને ચાઇનામેન સ્પિનર કુલદીપ યાદવને પ્લેઇંગ-11માં સામેલ કરવાની સંભાવના છે.

હેડ-ટુ-હેડમાં ભારત આગળ

બન્ને ટીમો વચ્ચે અત્યાર સુધી રમાયેલી 28 T20 મેચોમાં ભારતે 15 જીત મેળવી છે, જ્યારે ન્યૂઝીલેન્ડે 10 મેચ જીતી છે. ભારતીય ધરતી પર ટીમ ઈન્ડિયાનો રેકોર્ડ વધુ મજબૂત છે, જ્યાં 12માંથી 8 મેચોમાં જીત નોંધાવી છે.

રાયપુર પિચ રિપોર્ટ

રાયપુરની પીચ સામાન્ય રીતે સંતુલિત માનવામાં આવે છે. શરૂઆતમાં ફાસ્ટ બોલરોને સ્વિંગ અને બાઉન્સ મળી શકે છે, પરંતુ જેમ જેમ મેચ આગળ વધશે તેમ પીચ ધીમી બનશે. રાત્રે સ્પિનરોને ખાસ મદદ મળવાની શક્યતા છે, જેથી કુલદીપ, બિશ્નોઈ અને વરુણ ચક્રવર્તી જેવા બોલરો નિર્ણાયક સાબિત થઈ શકે છે.

હવામાન અપડેટ

આજે રાયપુરમાં હવામાન સંપૂર્ણપણે મેચ માટે અનુકૂળ રહેશે. મહત્તમ તાપમાન 28°C અને લઘુત્તમ 14°C આસપાસ રહેશે. વરસાદની કોઈ શક્યતા નથી, જેથી મેચમાં કોઈ વિઘ્ન નહીં આવે.

અક્ષરની ગેરહાજરી: ફાયદો કે નુકસાન?

અક્ષર પટેલની ગેરહાજરીથી ભારતની બેટિંગ ડેપ્થ થોડી ઘટી શકે છે, પરંતુ જો કુલદીપ યાદવને તક મળે તો સ્પિન એટેક વધુ મજબૂત બનશે. ધીમી પીચને ધ્યાનમાં રાખીને ટીમ મેનેજમેન્ટ ત્રણ સ્પિનરો સાથે ઉતરવાનો દાવ પણ રમી શકે છે.

સંભવિત પ્લેઇંગ-11

ભારત:

સૂર્યકુમાર યાદવ (કેપ્ટન), અભિષેક શર્મા, સંજુ સેમસન (વિકેટકીપર), ઈશાન કિશન, રિંકુ સિંહ, હાર્દિક પંડ્યા, શિવમ દુબે, અક્ષર પટેલ/કુલદીપ યાદવ, અર્શદીપ સિંહ, જસપ્રીત બુમરાહ, વરુણ ચક્રવર્તી

ન્યૂઝીલેન્ડ:

મિચેલ સેન્ટનર (કેપ્ટન), ટિમ રોબિન્સન, ડેવોન કોનવે (વિકેટકીપર), રચિન રવીન્દ્ર, ડેરીલ મિચેલ, ગ્લેન ફિલિપ્સ, માર્ક ચેપમેન, ક્રિશ્ચિયન ક્લાર્ક, કાઇલ જેમિસન, ઈશ સોઢી, જેકબ ડફી