ઓડિશામાં મોટી દુર્ઘટના: હોસ્પિટલમાં આગ, ICUના 10 દર્દીઓના મોત

ઓડિશાના કટક શહેરમાં આવેલી SCB મેડિકલ કોલેજ અને હોસ્પિટલમાં સોમવાર વહેલી સવારે એક દુઃખદ ઘટના બની હતી. હોસ્પિટલના મેડિસિન વિભાગની ઈમારતમાં આવેલા ટ્રોમા કેર ICUમાં ભારે આગ લાગી હતી. આ અકસ્માતમાં અત્યાર સુધી ઓછામાં ઓછા 10 દર્દીઓના મોત થયા હોવાની માહિતી મળી છે.

સોમવારે સવારે લગભગ 3 વાગ્યે ટ્રોમા કેર યુનિટના પહેલા માળ પર આગ લાગી હતી. થોડા જ મિનિટોમાં આખા ICU વોર્ડમાં ધુમાડો ફેલાઈ ગયો હતો. તે સમયે વોર્ડમાં ઘણા ગંભીર દર્દીઓ લાઈફ સપોર્ટ સિસ્ટમ પર હતા.

ફાયર બ્રિગેડની ત્રણ ગાડીઓ તૈનાત

હોસ્પિટલના સ્ટાફ અને અગ્નિશામક દળે તરત બચાવ કામગીરી શરૂ કરી. છતાં પણ કેટલીક ગંભીર હાલતમાં રહેલા દર્દીઓ ધુમાડા અને આગની તીવ્ર લપેટમાં આવી ગયા. હોસ્પિટલ પ્રશાસન અને ફાયર બ્રિગેડની તાત્કાલિક કાર્યવાહીથી અનેક દર્દીઓને સુરક્ષિત રીતે બહાર કાઢવામાં આવ્યા.

બચી ગયેલા અને ગંભીર હાલતમાં રહેલા દર્દીઓને તરત જ ‘ન્યૂ મેડિસિન ICU’ માં ખસેડવામાં આવ્યા જેથી તેમની સારવાર ચાલુ રહી શકે. આગ પર કાબૂ મેળવવા માટે ફાયર બ્રિગેડની ત્રણ ગાડીઓ તૈનાત કરવામાં આવી અને ઘણા સમયની મહેનત પછી આગને ઓલવવામાં આવી.

મુખ્યમંત્રીએ સ્થળની મુલાકાત લીધી

આ ઘટનાની ખબર મળતાં જ મુખ્યમંત્રી મોહન માઝી સ્થળ પર પહોંચ્યા હતા. તેમણે પરિસ્થિતિનો અંદાજ લીધો અને પીડિત પરિવારોને મળીને પોતાની સંવેદના વ્યક્ત કરી હતી. ત્યાં આરોગ્ય સચિવ, કટક જિલ્લાના કલેક્ટર અને ડીસીપી પણ હાજર રહ્યા અને રાહત તથા બચાવ કામગીરી પર નજર રાખી હતી.

પાંચ દર્દીઓ ગંભીર રીતે ઘાયલ

મુખ્યમંત્રી માઝીએ જણાવ્યું કે તે વોર્ડમાં કુલ 23 દર્દીઓ દાખલ હતા. બચાવ કામગીરી શરૂ થાય તે પહેલાં જ વોર્ડની અંદર 7 લોકોના મોત થઈ ગયા હતા. બચાવ કર્યા પછી વધુ 3 લોકોના મોત ઇજા અને ધુમાડાના કારણે થયા. આમ કુલ 10 લોકોના મોત થયા છે.

ઓછામાં ઓછા પાંચ દર્દીઓ ગંભીર રીતે ઘાયલ થયા છે. હોસ્પિટલમાં સારવાર લઈ રહેલા બે કર્મચારીઓ પણ ગંભીર રીતે ઘાયલ થયા છે. મુખ્યમંત્રીએ મૃતકોના પરિવારને 25 લાખ રૂપિયાનું વળતર આપવાની જાહેરાત પણ કરી.