Manoj Bajpayee Film Controversy: સુપ્રીમ કોર્ટની નિર્માતા નીરજ પાંડેને ફટકાર, CBFCને નોટિસ

બોલિવૂડ અભિનેતા મનોજ બાજપેયીની આગામી ફિલ્મ **‘ઘુસખોર પંડત’**ને લઈને શરૂ થયેલો વિવાદ હવે સુપ્રીમ કોર્ટ સુધી પહોંચી ગયો છે. 12 ફેબ્રુઆરી 2026ના રોજ સુપ્રીમ કોર્ટે ફિલ્મના શીર્ષક પર સખત વાંધો વ્યક્ત કરતાં સ્પષ્ટ કર્યું કે, ટાઇટલ બદલ્યા વગર ફિલ્મને રિલીઝ કરવાની મંજૂરી આપવામાં નહીં આવે.

સુપ્રીમ કોર્ટની ટિપ્પણી

જસ્ટિસ બીવી નાગરત્ના અને ઉજ્જલ ભૂયાનની બેન્ચે સુનાવણી દરમિયાન પ્રશ્ન ઉઠાવ્યો કે, “આવા શીર્ષક દ્વારા શું તમે સમાજના એક ચોક્કસ વર્ગને બદનામ કરી રહ્યા નથી?” કોર્ટે ફિલ્મના નામને વિવાદાસ્પદ ગણાવી કેન્દ્ર સરકારના માહિતી અને પ્રસારણ મંત્રાલય તેમજ CBFCને નોટિસ ફટકારી છે.

અદાલતે નિર્માતાઓને સોગંદનામું દાખલ કરીને ફિલ્મનું નવું શીર્ષક રજૂ કરવા નિર્દેશ આપ્યો છે. આગામી સુનાવણી 19 ફેબ્રુઆરીએ નક્કી કરવામાં આવી છે.

વિવાદ કેવી રીતે શરૂ થયો?

3 ફેબ્રુઆરી 2026ના રોજ ઓટીટી પ્લેટફોર્મ પર ફિલ્મની જાહેરાત થતાં જ સોશિયલ મીડિયા પર વિરોધ શરૂ થયો હતો. બ્રાહ્મણ અને સંત સમુદાયે આ શીર્ષકને અપમાનજનક ગણાવ્યું હતું. અનેક શહેરોમાં વિરોધ પ્રદર્શન થયા અને કેટલાક સ્થળોએ પુતળા દહન પણ થયા.

રાજકીય પ્રતિક્રિયા

બહુજન સમાજ પાર્ટીના વડા માયાવતીએ ફિલ્મ પર પ્રતિબંધની માંગ કરી છે. ઉત્તર પ્રદેશમાં FIR નોંધાઈ હોવાનું પણ જાણવા મળે છે. વિશ્વ હિન્દુ પરિષદ (VHP) એ પણ આ મુદ્દે વિરોધ નોંધાવ્યો છે.

નિર્માતાઓની સ્પષ્ટતા

વિવાદ વધતા નિર્માતા નીરજ પાંડે અને મનોજ બાજપેયીએ સ્પષ્ટતા કરી હતી કે ફિલ્મની વાર્તા એક ભ્રષ્ટ પોલીસ અધિકારી ‘અજય દીક્ષિત’ પર આધારિત છે, જેને વિભાગમાં ‘પંડત’ ઉપનામથી ઓળખવામાં આવે છે. આ કોઈ સમુદાય વિરુદ્ધ નથી. છતાં વિરોધ યથાવત રહેતાં પ્રમોશનલ સામગ્રી હટાવી દેવામાં આવી છે.

FMCનો નોટિસ

ફિલ્મ નિર્માતા સંગઠન (FMC) એ પણ શીર્ષક માટે યોગ્ય પ્રક્રિયા અનુસરાઈ કે નહીં તે અંગે નોટિસ પાઠવી છે. નિયમ ભંગ સાબિત થાય તો શિસ્તભંગની કાર્યવાહી થઈ શકે છે.