Mardaani 3 Review: રાની મુખર્જી ફરી બની શિવાની રોય, ફર્સ્ટ હાફ જ ઝંઝાવાત સમાન

બોલીવુડ અભિનેત્રી રાની મુખર્જીની ખૂબ પ્રતિક્ષિત ફિલ્મ ‘મર્દાની 3’ આજે, 30 જાન્યુઆરી 2026ના રોજ સિનેમાઘરોમાં રિલીઝ થઈ ગઈ છે. ફિલ્મનો પહેલો શો શરૂ થતાની સાથે જ સ્પષ્ટ થઈ જાય છે કે રાની એક વખત ફરી પોતાના શક્તિશાળી અભિનયથી દર્શકોને બાંધી રાખવામાં સફળ રહી છે.

રાની મુખર્જીનો શક્તિશાળી પોલીસ અવતાર

‘મર્દાની’ ફ્રેન્ચાઇઝીમાં રાની મુખર્જી હંમેશા શિવાની શિવાજી રોયના પાત્રમાં દમદાર લાગી છે. હ્યુમન ટ્રાફિકિંગ જેવા સંવેદનશીલ વિષય પર આધારિત આ સિરીઝની ત્રીજી ફિલ્મમાં પણ રાની સંપૂર્ણ ફોર્મમાં જોવા મળે છે. ટ્રેલરે પહેલેથી જ સંકેત આપ્યો હતો કે આ ભાગ વધુ અંધકારમય અને ગંભીર હશે, અને ફર્સ્ટ હાફ સુધીમાં ફિલ્મ તે વચન પર ખરી ઊતરે છે.

દમદાર રાની સામે ભયંકર વિલન ‘અમ્મા’

આ વખતે શિવાની સામે કેસ છે એક એમ્બેસેડરની દીકરીના અપહરણનો. આ સાથે તેના કેરટેકરની દીકરી પણ ગુમ છે. તપાસ આગળ વધતાં ખુલાસો થાય છે કે આ કેસ એક મોટા હ્યુમન ટ્રાફિકિંગ રિંગ સાથે જોડાયેલો છે, જેને ચલાવે છે ‘અમ્મા’ (મલ્લિકા પ્રસાદ).

અમ્મા ભીખારી-માફિયા સાથે સંકળાયેલી ખતરનાક અને સનકી સ્ત્રી છે. તેની એન્ટ્રી સાથે જ ફિલ્મમાં થ્રિલ અને ડર બંને છવાઈ જાય છે. તાજેતરના સમયમાં મોટા પડદા પર દેખાયેલા સૌથી ખૂંખાર વિલનોમાં અમ્માની ગણના ચોક્કસ થઈ શકે.

કેવી છે ફિલ્મની કહાની?

કહાની એ સમયે વધુ ગંભીર બની જાય છે જ્યારે અમ્મા શિવાનીના ઘર સુધી પહોંચી જાય છે. અપહરણ કરાયેલી બંને બાળાઓને અલગ કરી દેવામાં આવી છે. એમ્બેસેડરની દીકરી સુધી પહોંચવા શિવાની લગભગ સફળ થવા આવી છે, પરંતુ મોટો પ્રશ્ન એ છે કે —

શું સરકારી તંત્ર ગરીબ કેરટેકરની દીકરી માટે પણ એટલી જ તાકાત અને સંસાધનો ખર્ચશે?

ફર્સ્ટ હાફ – સંપૂર્ણ પકડ

ફર્સ્ટ હાફ ખૂબ જ દમદાર છે. કહાની ગંભીર છે, પ્રેઝન્ટેશન તીખું છે અને રાની મુખર્જી દરેક સીનમાં ભારોભાર છવાઈ જાય છે. તપાસ આગળ વધતી જાય છે અને દર્શક કોઈ પણ ક્ષણે ફિલ્મથી અલગ થવા માગતો નથી. થ્રિલ, ઈમોશન અને સામાજિક પ્રશ્નોનો મજબૂત સમન્વય અહીં જોવા મળે છે.