અમદાવાદ: જુહાપુરામાં યુવતીની છેડતી બાબતે બે જૂથ વચ્ચે પથ્થરમારો, 5 આરોપી ઝડપાયા

અમદાવાદ શહેરના જુહાપુરા વિસ્તારમાં ગત મોડી રાત્રે બે જૂથો વચ્ચે ગંભીર અથડામણ અને પથ્થરમારાની ઘટના બની હતી. આ માથાકૂટનું મૂળ બે મહિના પહેલાં યુવતીની છેડતી બાબતે થયેલા ઝઘડાને લઈને ઠપકો આપવા બાબતે બોલાચાલીમાં હતું. પરિણામે બંને જૂથના 10થી 15 લોકોનું ટોળું લાકડીઓ અને અન્ય હથિયારો સાથે આમને સામને આવી ગયું હતું.

• હથિયારો સાથે 15 લોકોનું ટોળું આમને સામને

વેજલપુર પોલીસ સ્ટેશનમાં નોંધાયેલી ફરિયાદ મુજબ, જુહાપુરામાં ફતેવાડી પાસે નૂરે મસ્જિદની ગલીમાં આવેલા વિસ્તારમાં ઇમરાન ભરામણી અને કુરબાન ભાઈ બબાણી સહિતના લોકો સામસામે આવી ગયા હતા. આ બંને જૂથના લોકોએ એકબીજાના ઘર તરફ પથ્થરમારો કર્યો હતો અને સામસામે લાકડીઓ લઈ મારામારી અને ઝપાઝપી પર ઉતરી આવ્યા હતા.

• બંને પક્ષે રિવોલ્વર બતાવી ધમકી આપી

આ હિંસક ઝઘડા દરમિયાન ગંભીર બાબત એ બની કે બંને પક્ષો તરફથી બે લોકોએ એકબીજાને રિવોલ્વર દેખાડીને ધમકી પણ આપી હતી, જે ઘટનાની ગંભીરતા દર્શાવે છે. બે જૂથો વચ્ચે પથ્થરમારો અને હથિયારોની ધમકીની આ સમગ્ર ઘટના સોસાયટીમાં લાગેલા CCTV કેમેરામાં કેદ થઈ ગઈ હતી.

• પોલીસ આવતા ટોળું વિખરાયું, સર્ચ ઓપરેશન શરૂ

ઘટનાની જાણ થતાં જ વેજલપુર પોલીસ સ્ટેશનના PI સહિતનો પોલીસ કાફલો તાત્કાલિક ઘટનાસ્થળ ઉપર પહોંચી ગયો હતો. પોલીસની હાજરી થતાં જ પથ્થરમારો કરતું ટોળું વિખરાઈ ગયું હતું. ઘટનાની ગંભીરતાને ધ્યાનમાં લઈને પોલીસે તરત જ બંને પક્ષના ઘરમાં સઘન સર્ચ ઓપરેશન હાથ ધર્યું હતું.