ગુજરાત સરકારનો મોટો નિર્ણય: મહિનાના અંત સુધી પોલીસમાં 14507 ભરતી, 4473ને નિમણૂક પત્રો વિતરણ

Gujarat Government Jobs : ગાંધીનગરના મહાત્મા મંદિર ખાતે “વિકસિત ભારત – વિકસિત ગુજરાત” કાર્યક્રમ અંતર્ગત રાજ્ય સરકારના વિવિધ વિભાગોમાં વર્ગ-3 કેડરમાં પસંદ થયેલા કુલ 4,473 ઉમેદવારોને નિમણૂકપત્રો એનાયત કરવામાં આવ્યા હતા. મુખ્યમંત્રી ભૂપેન્દ્ર પટેલના હસ્તે તથા નાયબ મુખ્યમંત્રી હર્ષ સંઘવીની ઉપસ્થિતિમાં પ્રતિકાત્મક રૂપે 21 ઉમેદવારોને નિમણૂકપત્રો અપાયા હતા.

‘સરકારી નોકરી માત્ર નિમણૂક નહીં, રાષ્ટ્રનિર્માણની તક’ — CM પટેલ

કાર્યક્રમમાં મુખ્યમંત્રીએ યુવાનોને સંબોધિત કરતાં જણાવ્યું કે સરકારી સેવા સામાન્ય માનવીની સમસ્યાઓ દૂર કરીને રાષ્ટ્રનિર્માણમાં યોગદાન આપવાની તક છે. તેમણે જણાવ્યું કે વડાપ્રધાન નરેન્દ્ર મોદીએ *”નાગરિક દેવો ભવ”*ના મંત્ર સાથે ટ્રાન્સપરન્સી, ડિજિટલ ટેક્નોલોજી અને હ્યુમન રિસોર્સ મેનેજમેન્ટમાં મોટાપાયે પરિવર્તન લાવ્યા છે, જેને ગુજરાતે પારદર્શક ભરતી પ્રક્રિયાથી સાકાર કર્યું છે.

મુખ્યમંત્રીએ વધુમાં જણાવ્યું કે રાજ્ય સરકાર માનવ સંસાધનોના કાર્યક્ષમ ઉપયોગ માટે 3,000થી વધુ કેડરની માહિતી સાથે કેડર મેનેજમેન્ટ પોર્ટલ અને 10 વર્ષીય ભરતી કેલેન્ડર અમલમાં લાવી ચૂકી છે, જેના ફળે ભાવિ ભરતી માટે આયોજન સરળ બન્યું છે.

યુવાનો માટે પોલીસમાં 14,507 નવી જગ્યા: નાયબ મુખ્યમંત્રી હર્ષ સંઘવીની જાહેરાત

કાર્યક્રમ દરમિયાન નાયબ મુખ્યમંત્રીએ જણાવ્યું કે સ્પર્ધાત્મક પરીક્ષાની તૈયારી કરતા લાખો યુવાનો માટે આ મહિનાના અંત સુધીમાં ગુજરાત પોલીસ દળમાં કુલ 14,507 નવી જગ્યાઓ માટે ભરતી પ્રક્રિયા જાહેર થશે. જેમાં PSI અને લોકરક્ષક સહિતની 13,591 જગ્યાઓ અને ટેકનિકલ કેડરની 916 જગ્યાઓનો સમાવેશ થાય છે.

તેમણે ગૌણ સેવા પસંદગી મંડળની ઓનલાઈન અને ઝડપી ભરતી પ્રક્રિયાની પ્રશંસા કરતાં જણાવ્યું કે એપ્રિલ 2025થી અત્યાર સુધીમાં 101 પરીક્ષાઓ યોજીને મંડળે રેકોર્ડ બનાવ્યો છે.

વડાપ્રધાનનો સંદેશો

વડાપ્રધાન નરેન્દ્ર મોદીએ સંદેશા દ્વારા નવ નિયુક્ત યુવાનોને અભિનંદન પાઠવ્યા હતા અને “વિકસિત ભારત” માટે પોતાનું મહત્તમ યોગદાન આપવા શુભકામનાઓ આપી હતી.

ઉમેદવારોની પસંદગીનો હિસ્સો

રાજ્યભરમાંથી પસંદગી પામેલા ઉમેદવારોમાં મુખ્યત્વે:

1. જુનિયર ક્લાર્ક – 2,828
2. સિનિયર ક્લાર્ક – 339
3. હેડ ક્લાર્ક – 138
4. સબ રજિસ્ટ્રાર – 92
5. સમાજ કલ્યાણ સંબંધિત વિવિધ કેડર – 164
6. અન્ય વિવિધ કેડર – 882

આ રીતે કુલ 4,473 જગ્યાઓ માટે સફળ ઉમેદવારોને નિયુક્તિ પત્રો અપાયા.