Metaનું મોટું એલાન: Instagramમાં End-to-End Encryption બંધ થશે, પ્રાઈવસી પર સવાલ

ઇન્સ્ટાગ્રામ પર એન્ડ-ટુ-એન્ડ એન્ક્રિપ્ટેડ ચેટ ફીચર 8 મે 2026 પછી ઉપલબ્ધ રહેશે નહીં. એટલે કે આ તારીખ પછી ઇન્સ્ટાગ્રામના DMમાં આ સુરક્ષા સુવિધા નહીં રહે. આ માહિતી ઇન્સ્ટાગ્રામના સત્તાવાર હેલ્પ પેજ પર આપવામાં આવી છે, જ્યાં સ્પષ્ટ લખ્યું છે કે 8 મે 2026 પછી ઇન્સ્ટાગ્રામ એન્ડ-ટુ-એન્ડ એન્ક્રિપ્ટેડ મેસેજિંગ સપોર્ટ નહીં કરે. જો કોઈ યુઝરની ચેટ આ ફીચર હેઠળ હશે, તો તેમને પહેલા જ નોટિફિકેશન મળશે અને તેઓ પોતાના ચેટ ડેટા ડાઉનલોડ પણ કરી શકશે.

એન્ડ-ટુ-એન્ડ એન્ક્રિપ્શન શું હોય છે
એન્ડ-ટુ-એન્ડ એન્ક્રિપ્શન એવી ટેક્નોલોજી છે જેમાં મેસેજ મોકલનાર અને પ્રાપ્ત કરનાર સિવાય કોઈ ત્રીજો વ્યક્તિ તે વાંચી શકતો નથી. પ્લેટફોર્મ ચલાવતી કંપની પણ તે મેસેજ વાંચી શકતી નથી. આ ટેક્નોલોજીમાં મેસેજ મોકલતાં જ તે એક કોડમાં બદલાઈ જાય છે અને ફક્ત રિસીવરનાં ડિવાઇસ પર જ ડિક્રિપ્ટ થાય છે. આ કારણથી તેને ડિજિટલ દુનિયામાં સૌથી મજબૂત પ્રાઈવસી સુરક્ષા માનવામાં આવે છે. Signal અને WhatsApp જેવા ઘણા મેસેજિંગ પ્લેટફોર્મ્સ આ ટેક્નોલોજીનો ઉપયોગ કરે છે જેથી યુઝર્સની વાતચીત સંપૂર્ણ ખાનગી રહે.

ઇન્સ્ટાગ્રામમાં આ ફીચર ક્યારે આવ્યું હતું?
ઇન્સ્ટાગ્રામે એન્ડ-ટુ-એન્ડ એન્ક્રિપ્શન ફીચર લગભગ 2023 આસપાસ પોતાના મેસેજિંગ સિસ્ટમમાં ઉમેરવાનું શરૂ કર્યું હતું. શરૂઆતમાં આ ફીચર બધાને ડિફોલ્ટ રીતે મળતું ન હતું, યુઝર્સે તેને અલગથી ચાલુ કરવું પડતું હતું. આ ફીચર ચાલુ કર્યા પછી વાતચીત એક અલગ એન્ક્રિપ્ટેડ ચેટમાં થતી હતી અને તેમાં વધારાના સુરક્ષા વિકલ્પો પણ મળતા હતા, પરંતુ હવે કંપનીએ તેને સંપૂર્ણ રીતે બંધ કરવાનો નિર્ણય લીધો છે.

મેટાએ આ નિર્ણય કેમ લીધો?
ઇન્સ્ટાગ્રામની પેરેન્ટ કંપની મેટાનું કહેવું છે કે, આ ફીચરનો ઉપયોગ ખૂબ ઓછા લોકો કરતા હતા. તેથી કંપનીએ તેને બંધ કરવાનો નિર્ણય લીધો છે. કંપની પહેલેથી યુઝર્સને નોટિફિકેશન મોકલી રહી છે જેથી તેઓ ઇચ્છે તો પોતાની એન્ક્રિપ્ટેડ ચેટ અને મીડિયા ફાઇલ્સ ડાઉનલોડ કરી શકે.