Mexico Tariff Hike 2026: ચીન, ભારત સહિત એશિયાઈ દેશો પર 50% સુધી ટેરિફ લાગુ થશે

Updated: 11-12-2025, 08.46 AM

Mexico Tariff Hike 2026: દુનિયામાં ફરી એકવાર ટેરિફ વૉરની અસર દેખાવા લાગી છે. જેમ અમેરિકા છેલ્લા કેટલાક સમયથી આયાતી માલ પર ભારે ટેરિફ લગાવી રહ્યું છે, તેમ હવે મેક્સિકો પણ એ જ દિશામાં આગળ વધ્યો છે. મેક્સિકોની સેનેટે ચીન સહિત અનેક એશિયાઈ દેશોમાંથી આયાત થતી વસ્તુઓ પર 50% સુધીના નવા ટેરિફ વધારાનો પ્રસ્તાવ મંજૂર કરી દીધો છે, જે વર્ષ 2026થી અમલમાં આવશે.

1,400 આયાતી પ્રોડક્ટ્સ પર ઊંચો ટેરિફ

નવા બિલમાં લગભગ 1,400 પ્રોડક્ટ કેટેગરીઝ સામેલ છે. જેમાં ઓટો-પાર્ટ્સ, સ્ટીલ, ટેક્સટાઈલ જેવા મહત્ત્વના સેક્ટર્સ છે. ઘણાં પ્રોડક્ટ્સ પર ટેરિફ 35% સુધી વધારવામાં આવશે. સેનેટમાં આ બિલ 76 મતની બહુમતિથી પાસ થયું.

કયા દેશોને પડશે વધુ અસર?

આ નવા ટેરિફનો સૌથી વધારે ફટકો નીચેના દેશોને પડશે:

ચીન

ભારત

દક્ષિણ કોરિયા

થાઈલેન્ડ

ઇન્ડોનેશિયા

આ તમામ દેશો મેક્સિકોને મોટાપાયે મેન્યુફેક્ચર્ડ પ્રોડક્ટ્સ નિકાસ કરે છે.

મેક્સિકો આ પગલું કેમ લઈ રહ્યો છે?

વિશ્લેષકોના મતે મેક્સિકો મુખ્યત્વે સ્થાનિક ઉદ્યોગોને સુરક્ષિત કરવા અને અમેરિકાના દબાણને ધ્યાનમાં રાખીને આ પગલું લઈ રહ્યો છે. આ સાથે દેશને 3.76 અબજ ડોલરની વધારાની આવક થવાની આશા છે, જેથી નાણાકીય ખાધ પૂરી કરવામાં મદદ મળશે.