મોહમ્મદ શમીને ચૂંટણી પંચની નોટિસ, SIR અંગે સુનાવણી માટે સમન્સ પાઠવવામાં આવ્યું

Mohammed Shami Summoned For SIR Hearing: ભારતીય ફાસ્ટ બોલર મોહમ્મદ શમી એક નવા વિવાદમાં ફસાયા છે. ચૂંટણી પંચે તેમને અને તેમના ભાઈ મોહમ્મદ કૈફને સ્પેશિયલ ઇન્ટેન્સિવ રિવ્યૂ (SIR) પ્રક્રિયા અંતર્ગત સુનાવણી માટે સમન્સ પાઠવ્યું છે. આ પ્રક્રિયા 16 ડિસેમ્બરથી શરૂ થઈ હતી.

સોમવારે દક્ષિણ કોલકાતાના જાદવપુર વિસ્તારમાં આવેલી કાર્તજુ નગર સ્કૂલને નોટિસ પાઠવવામાં આવી હતી, જેમાં શમીને સહાયક ચૂંટણી નોંધણી અધિકારી (AERO) સમક્ષ હાજર થવાનો આદેશ આપવામાં આવ્યો હતો. જોકે, નોટિસમાં દર્શાવેલી તારીખે મોહમ્મદ શમી હાજર રહ્યા નહોતા.

મીડિયા રિપોર્ટ્સ મુજબ, શમી હાલમાં રાજકોટમાં છે, જ્યાં તે વિજય હજારે ટ્રોફીમાં બંગાળ ટીમનું પ્રતિનિધિત્વ કરી રહ્યો છે. ચૂંટણી પંચને જાણ કરવામાં આવી છે કે તે વ્યાવસાયિક પ્રતિબદ્ધતાઓને કારણે હાજર રહી શક્યો નથી.

ઉલ્લેખનીય છે કે મોહમ્મદ શમી કોલકાતા મ્યુનિસિપલ કોર્પોરેશન (KMC) ના વોર્ડ નંબર 93માં મતદાર તરીકે નોંધાયેલ છે, જે રાસબિહારી વિધાનસભા મતવિસ્તાર હેઠળ આવે છે. તેમનો જન્મ ઉત્તર પ્રદેશના અમરોહામાં થયો હોવા છતાં, તેઓ લાંબા સમયથી કોલકાતાના કાયમી રહેવાસી છે.

ક્રિકેટની વાત કરીએ તો, શમી હાલ ભારતીય ટીમમાં વાપસી માટે સંઘર્ષ કરી રહ્યો છે. તેને તાજેતરમાં ન્યૂઝીલેન્ડ સામેની ODI શ્રેણી માટે પસંદ કરવામાં આવ્યો ન હતો. તે છેલ્લે ભારત માટે ચેમ્પિયન્સ ટ્રોફી 2025માં રમ્યો હતો.

રાષ્ટ્રીય ટીમમાંથી બહાર થયા બાદ, શમીએ ઘરેલુ ક્રિકેટમાં શાનદાર પ્રદર્શન કર્યું છે. આ સિઝનમાં તેણે રણજી ટ્રોફી, સૈયદ મુશ્તાક અલી ટ્રોફી અને વિજય હજારે ટ્રોફીમાં મળીને 200થી વધુ ઓવર ફેંકી કુલ 47 વિકેટ ઝડપી છે. વિજય હજારે ટ્રોફીમાં તે બંગાળ માટે સૌથી વધુ વિકેટ લેનાર બોલર રહ્યો છે.

વિજય હજારે ટ્રોફી બાદ શમી રણજી ટ્રોફીની બાકી મેચો રમશે અને ત્યારબાદ IPL 2026માં લખનૌ સુપર જાયન્ટ્સ તરફથી રમતો જોવા મળશે. હવે ચૂંટણી પંચ આ મામલે આગળ શું નિર્ણય લે છે, તેની ઉપર સૌની નજર રહેશે.