હવે ઘરે બેઠા આધાર મોબાઇલ નંબર અને સરનામું અપડેટ કરો, જાણો 50 નવી સુવિધાઓ

ભારત સરકાર અને UIDAIએ આધાર વપરાશકર્તાઓ માટે એક મોટું ડિજિટલ પગલું ભર્યું છે. નવી Aadhaar App લોન્ચ કરવામાં આવી છે, જેની મદદથી હવે આધાર કાર્ડમાં જરૂરી અપડેટ્સ માટે આધાર સેન્ટર જવાની જરૂર રહેશે નહીં. યુઝર્સ હવે ઘરે બેઠા પોતાના સ્માર્ટફોન દ્વારા મોબાઇલ નંબર અને સરનામું અપડેટ કરી શકશે.

50 નવી સુવિધાઓ સાથે નવી આધાર એપ

UIDAIની નવી આધાર એપમાં 50થી વધુ અદ્યતન સુવિધાઓ ઉમેરવામાં આવી છે. તેમાં ઓફલાઇન આધાર વેરિફિકેશન, સિલેક્ટિવ ડેટા શેરિંગ, મોબાઇલ નંબર અપડેટ, સરનામું બદલવાની સુવિધા અને પરિવારના આધાર ડિટેલ્સ મેનેજ કરવાની ક્ષમતા સામેલ છે. આ એપ યુઝર્સને સંપૂર્ણ આધાર વિગતો શેર કર્યા વિના ઓળખ ચકાસણી કરવાની છૂટ આપે છે.

ડેટા દુરુપયોગ પર રોક

UIDAI અનુસાર, હજુ પણ ઘણા લોકો હોટલ ચેક-ઇન, સિમ કાર્ડ, ઓફિસ વેરિફિકેશન માટે આધારની ફોટોકોપી આપે છે, જેનાથી ડેટા મિસયુઝનું જોખમ વધી જાય છે. નવી આધાર એપ ઓફલાઇન વેરિફિકેશન દ્વારા આ સમસ્યાનો ઉકેલ લાવશે, જ્યાં આધાર નંબર કે બાયોમેટ્રિક ડેટા શેર કર્યા વિના ઓળખ પુષ્ટિ થઈ શકે છે.

મોબાઇલ નંબર અને સરનામું કેવી રીતે અપડેટ કરશો?

• નવી આધાર એપમાં અપડેટ કરવાની પ્રક્રિયા ખૂબ સરળ છે:
• આધાર એપ ખોલી આધાર-બેઝ્ડ ઓથેંટિકેશનથી લોગ-ઇન કરો
• હોમ સ્ક્રીન પર ‘Aadhaar Details Update’ વિકલ્પ પસંદ કરો
• મોબાઇલ નંબર અથવા સરનામું પસંદ કરો
• નવી વિગતો દાખલ કરીને વિનંતી સબમિટ કરો
• જરૂરી ઓથેંટિકેશન પૂર્ણ કરો
• અપડેટ માટે ₹75 ફી ચૂકવો
• ચકાસણી પૂર્ણ થયા બાદ અપડેટ વિગતો તમારા આધાર રેકોર્ડમાં દર્શાવવામાં આવશે.

ડિજિટલ ઇન્ડિયા તરફ વધુ એક પગલું

નવી આધાર એપ ભારતના Digital Public Infrastructureને વધુ મજબૂત બનાવશે. આ એપ ઓળખ સેવાઓને વધુ સુરક્ષિત, સુલભ અને યુઝર-ફ્રેન્ડલી બનાવવાના ઉદ્દેશ્યથી તૈયાર કરવામાં આવી છે.