Ranveer Singh Film ‘ધુરંધર’ પાકિસ્તાનમાં નંબર 1 ટ્રેન્ડિંગ, પ્રતિબંધ છતાં Netflix પર મચાવ્યો ધમાકો

બોલિવૂડ એક્ટર રણવીર સિંહની ફિલ્મ ‘ધુરંધર’ હાલ સર્વત્ર ચર્ચામાં છે. ઘણા દેશોમાં આ ફિલ્મ પર પ્રતિબંધ હોવા છતાં, બોક્સ ઓફિસ અને OTT પ્લેટફોર્મ પર ફિલ્મે જોરદાર સફળતા મેળવી છે. સૌથી ચોંકાવનારી વાત એ છે કે પાકિસ્તાનમાં પ્રતિબંધ હોવા છતાં ફિલ્મ ત્યાં નંબર 1 ટ્રેન્ડિંગ બની ગઈ છે.

તાજેતરમાં જ ‘ધુરંધર’ને Netflix પર રિલીઝ કરવામાં આવી હતી. રિલીઝ થતાં જ ફિલ્મને દર્શકોનો ભરપૂર પ્રતિસાદ મળ્યો અને તે તરત જ ભારત ઉપરાંત પાકિસ્તાનમાં પણ ટોપ ટ્રેન્ડિંગ ફિલ્મ બની ગઈ. સોશિયલ મીડિયા પર વાયરલ થઈ રહેલા સ્ક્રીનશોટ્સમાં સ્પષ્ટ જોવા મળે છે કે પાકિસ્તાનમાં Netflix પર આ ફિલ્મ પ્રથમ સ્થાન પર છે.

ઉલ્લેખનીય છે કે પાકિસ્તાનના સિનેમાઘરોમાં ‘ધુરંધર’ને રિલીઝ કરવાની મંજૂરી આપવામાં આવી ન હતી. છતાં, OTT પ્લેટફોર્મના માધ્યમથી આ ફિલ્મ ત્યાંના ઘરો સુધી પહોંચી ગઈ છે અને દર્શકો તેને મોટી સંખ્યામાં જોઈ રહ્યા છે.

ફિલ્મની વાર્તા ભારત-પાકિસ્તાન વચ્ચેની જાસૂસી અને આતંકવાદ સામેની લડાઈ પર આધારિત છે. રણવીર સિંહ ફિલ્મમાં એક ભારતીય એજન્ટના પાત્રમાં જોવા મળે છે, જે આતંકવાદીઓના નેટવર્કની ગુપ્ત માહિતી મેળવવા માટે છૂપી રીતે પાકિસ્તાનમાં પ્રવેશ કરે છે.

ફિલ્મમાં રણવીર સિંહ સાથે અક્ષય ખન્ના મુખ્ય ભૂમિકામાં છે, જેમનો નેગેટિવ રોલ દર્શકોને ખૂબ પસંદ આવ્યો છે. આ ઉપરાંત અર્જુન રામપાલ, સારા અર્જુન, સંજય દત્ત અને આર. માધવન જેવા દિગ્ગજ કલાકારો પણ મહત્વની ભૂમિકામાં છે.

ફિલ્મનો વિષય સંવેદનશીલ હોવાના કારણે તેને પાકિસ્તાન અને મધ્ય પૂર્વના કેટલાક દેશોમાં રિલીઝ કરવાની મંજૂરી મળી ન હતી, પરંતુ OTT પર મળેલી સફળતાએ સાબિત કરી દીધું છે કે ‘ધુરંધર’ સરહદોની મર્યાદા તોડી ચૂકી છે.

મીડિયા રિપોર્ટ્સ અનુસાર, હવે ‘ધુરંધર’ના બીજા ભાગની તૈયારી પણ શરૂ થઈ ગઈ છે, જેને લઈને ફેન્સમાં ભારે ઉત્સાહ જોવા મળી રહ્યો છે.