રેપર Badshahની મુશ્કેલીમાં વધારો: ‘ટટીરી’ ગીત મામલે હરિયાણા પોલીસ એક્શનમાં

પંચકુલા પોલીસના જણાવ્યા અનુસાર, “ટટીરી” ગીતના વીડિયોમાં શિક્ષણ જગત અને સામાજિક મર્યાદાઓનું અપમાન કરવામાં આવ્યું છે. વીડિયોમાં શાળાના ગણવેશમાં સગીર વયની છોકરીઓને પોતાની સ્કૂલ બેગ ફેંકી દેતી અને અભ્યાસ છોડીને ભાગતી દર્શાવવામાં આવી છે.

આ દ્રશ્યો બાળકોના શિક્ષણ પ્રત્યે નકારાત્મક સંદેશ ફેલાવે છે તેવો પોલીસનો મત છે. વધુમાં, ગીતમાં “બાદશાલા” જેવા શબ્દોનો ઉપયોગ કરીને શૈક્ષણિક વાતાવરણની મજાક ઉડાવવામાં આવી હોવાનો આક્ષેપ છે.

ગીતમાં શું છે વાંધાજનક?

સૌથી ગંભીર બાબત એ છે કે ગીતના શબ્દોમાં મહિલાઓ અને યુવતીઓ પ્રત્યે અત્યંત અભદ્ર અને વાંધાજનક ભાષાનો પ્રયોગ કરવામાં આવ્યો છે. તપાસ દરમિયાન એ પણ સામે આવ્યું છે કે વીડિયોમાં હરિયાણા રોડવેઝની બસ અને એક સરકારી શાળાના કેમ્પસનો ઉપયોગ કરવામાં આવ્યો છે.

પોલીસ હવે એ તપાસ કરી રહી છે કે શું આ સરકારી મિલકતોના શૂટિંગ માટે સક્ષમ અધિકારીઓ પાસેથી પૂર્વ પરવાનગી લેવામાં આવી હતી કે નહીં. જો પરવાનગી વગર શૂટિંગ થયું હશે, તો કલમ 120-B હેઠળ અન્ય સંડોવાયેલા શખ્સો સામે પણ ગુનો નોંધાશે.

પોલીસની આકરી કાર્યવાહી અને ડિજિટલ સેન્સરશીપ

મામલાની ગંભીરતાને જોતા પંચકુલા પોલીસે બાદશાહને તાત્કાલિક હાજર થવા માટે ઔપચારિક નોટિસ ફટકારી છે. ધરપકડ માટે ખાસ ટીમોની રચના કરવામાં આવી છે. પોલીસની ત્વરિત કાર્યવાહીના પરિણામે, વિવાદાસ્પદ ગીતને બાદશાહની સત્તાવાર યુટ્યુબ ચેનલ પરથી હટાવી દેવામાં આવ્યું છે.

જોકે, અન્ય સોશિયલ મીડિયા પ્લેટફોર્મ્સ, મ્યુઝિક એપ્સ અને વ્યક્તિગત હેન્ડલ્સ પર હજુ પણ આ ગીતના અંશો ઉપલબ્ધ હોવાથી, પોલીસ તે તમામ પ્લેટફોર્મ્સને નોટિસ મોકલીને વીડિયો દૂર કરવાની પ્રક્રિયા કરી રહી છે.