મહારાષ્ટ્રના પાલઘરની કેમિકલ કંપનીમાં ઝેરી ગેસ લીક થતા ફફડાટ, સ્થાનિકો ભાગતા નજરે પડ્યા

મહારાષ્ટ્રના પાલઘર જિલ્લાના ઔદ્યોગિક પટ્ટામાં સોમવારે બપોરે એક ભયાનક ગેસ ગળતરની ઘટના બની હતી. એમઆઈડીસી (MIDC) ડી-ઝોન વિસ્તારમાં આવેલી ‘ભગેરિયા કેમિકલ્સ’ કંપનીના એક યુનિટમાંથી અચાનક ‘ઓલિયમ’ (સલ્ફ્યુરિક એસિડનો ધુમાડો) ગેસ લીક થવા લાગ્યો હતો. આ ઝેરી ગેસ હવામાં ફેલાતા જ આસપાસના રહેણાંક વિસ્તારોમાં ગભરાટ ફેલાઈ ગયો હતો, જેના પગલે વહીવટીતંત્રે તાત્કાલિક અસરથી 2,600 થી વધુ લોકોનું સુરક્ષિત સ્થળે સ્થળાંતર કર્યું છે.

બપોરના સમયે સર્જાઈ કટોકટી
જિલ્લા કલેક્ટર અને જિલ્લા આપત્તિ વ્યવસ્થાપન સત્તામંડળના વડા ડૉ. ઇન્દુ રાની જાખડના જણાવ્યા અનુસાર, આ ઘટના સોમવારે બપોરે 2 વાગ્યાની આસપાસ બની હતી. ફેક્ટરીમાંથી નીકળતા સફેદ ધુમાડા અને તીવ્ર ગંધને કારણે સ્થાનિક લોકોએ આંખોમાં બળતરા અને શ્વાસ લેવામાં તકલીફની ફરિયાદ કરી હતી. ઘટનાની ગંભીરતાને જોતા જિલ્લા વહીવટીતંત્ર, ફાયર બ્રિગેડ, પોલીસ અને આપત્તિ વ્યવસ્થાપનની ટીમો મિનિટોમાં જ ઘટનાસ્થળે પહોંચી ગઈ હતી.

સાવચેતીના પગલે મોટાપાયે સ્થળાંતર
આપત્તિ વ્યવસ્થાપન સત્તામંડળ દ્વારા જારી કરાયેલી અખબારી યાદીમાં જણાવાયું છે કે, ગેસ લીકેજની અસર વધતી જોઈને કંપનીની આસપાસના વિસ્તારોને ખાલી કરાવવાનો નિર્ણય લેવાયો હતો. કુલ 2600 થી વધુ રહેવાસીઓને તાત્કાલિક ખસેડવામાં આવ્યા હતા. સદનસીબે, કોઈ જાનહાનિના અહેવાલ નથી, પરંતુ કેટલાક લોકોને આંખોમાં હળવી બળતરા અને ગભરામણની અસર થતા તેમને પ્રાથમિક તબીબી સહાય પૂરી પાડવામાં આવી છે. ફાયર બ્રિગેડની ટીમે રાસાયણિક પ્રતિક્રિયાને કાબૂમાં લેવા માટે સતત પ્રયાસો કર્યા હતા.