રશિયાએ WhatsApp પર સંપૂર્ણ પ્રતિબંધ મૂક્યો, મેટાને મોટો ઝટકો

વિશ્વના સૌથી મોટા દેશ રશિયાએ અમેરિકન ટેક કંપની મેટાને મોટો ઝટકો આપતા તેના લોકપ્રિય મેસેજિંગ પ્લેટફોર્મ WhatsApp પર સંપૂર્ણ પ્રતિબંધ મૂકી દીધો છે. આ નિર્ણયની પુષ્ટિ કરતા ક્રેમલિનના પ્રવક્તા દિમિત્રી પેસ્કોવે જણાવ્યું કે મેટા રશિયન કાયદાઓનું પાલન કરવામાં નિષ્ફળ રહી છે, જેના કારણે આ પગલું લેવામાં આવ્યું છે.

પેસ્કોવે નાગરિકોને સ્થાનિક મેસેજિંગ એપ MAX નો ઉપયોગ કરવા અપીલ કરી છે.

‘MAX’ રાષ્ટ્રીય મેસેન્જર એપ તરીકે પ્રચારિત

રશિયન સરકાર મુજબ, MAX એક રાષ્ટ્રીય મેસેન્જર એપ છે, જે નાગરિકોની સુવિધા અને સરકારી સેવાઓને એકીકૃત કરવા માટે વિકસાવવામાં આવી છે. સરકારનો દાવો છે કે આ એપ દ્વારા રોજિંદા કાર્યો સરળ બને છે.

જો કે, ટીકાકારો MAXને “સર્વેલન્સ એપ” ગણાવી રહ્યા છે અને યુઝર્સની ગોપનીયતા અંગે ચિંતા વ્યક્ત કરી રહ્યા છે. રશિયન અધિકારીઓએ આ આક્ષેપોને નકારી કાઢ્યા છે.

‘સોવરિન કોમ્યુનિકેશન’ તરફ રશિયાનું પગલું

વિશ્લેષકો આ નિર્ણયને રશિયાની ‘સોવરિન કોમ્યુનિકેશન ઇન્ફ્રાસ્ટ્રક્ચર’ વિકસાવવાની વ્યૂહરચનાનો ભાગ માને છે. યુક્રેન યુદ્ધને કારણે અમેરિકા અને પશ્ચિમ દેશો સાથે વધતા તણાવ વચ્ચે રશિયા વિદેશી ટેક કંપનીઓ પર મોસ્કોના કાયદાનું કડક પાલન કરવા દબાણ કરી રહ્યું છે.

WhatsApp પર પ્રતિબંધને પણ આ જ નીતિના ભાગ રૂપે જોવામાં આવી રહ્યું છે.

VPN મારફતે હજી ઍક્સેસ શક્ય?

અહેવાલો મુજબ, સત્તાવાર રીતે રશિયામાં WhatsApp સેવા બંધ છે અને સંબંધિત કેટલાક ડોમેન નામો રાષ્ટ્રીય રજિસ્ટરમાંથી દૂર કરવામાં આવ્યા છે. તેમ છતાં, કેટલાક યુઝર્સ VPN (Virtual Private Network) નો ઉપયોગ કરીને એપ ઍક્સેસ કરી રહ્યા હોવાની માહિતી મળી રહી છે.

આ પગલાંથી રશિયામાં ડિજિટલ સ્વતંત્રતા અને ગોપનીયતા અંગે નવી ચર્ચા શરૂ થઈ છે, જ્યારે મેટા માટે આ એક મોટો આંતરરાષ્ટ્રીય ઝટકો માનવામાં આવી રહ્યો છે.