Shreyas Iyer Comeback: ઈજાથી સાજા થયા બાદ શ્રેયસ ઐયરની ધમાકેદાર વાપસી, વિજય હજારે ટ્રોફીમાં 53 બોલમાં 82 રન

Shreyas Iyer Comeback: ભારતના ODI વાઈસ-કેપ્ટન શ્રેયસ ઐયરે ઈજામાંથી સંપૂર્ણ સ્વસ્થ થયા બાદ ક્રિકેટ મેદાન પર જોરદાર વાપસી કરી છે. મંગળવાર, 6 જાન્યુઆરીએ રમાયેલી 2025-26 વિજય હજારે ટ્રોફીની મેચમાં તેણે મુંબઈ માટે શાનદાર ઇનિંગ રમી.

જયપુરમાં હિમાચલ પ્રદેશ સામેની મેચમાં શ્રેયસ ઐયરે માત્ર 53 બોલમાં 82 રન ફટકારી પોતાની ફોર્મ અને ફિટનેસનો દમદાર સંદેશ આપ્યો. તેની આ ઇનિંગમાં 10 ચોગ્ગા અને 3 છગ્ગા સામેલ રહ્યા. શ્રેયસ પાસે સદીની તક હતી, પરંતુ સ્પિનર કુશલ પાલનાની બોલિંગ પર કેચ થઈ ગયો.

મુંબઈની શરૂઆત નબળી રહી હતી. યશસ્વી જયસ્વાલ અને સરફરાઝ ખાન વહેલા આઉટ થતા સ્કોર 8 ઓવરમાં 55/2 હતો. ત્યારબાદ શ્રેયસ ઐયરે યુવા ખેલાડી મુશીર ખાન સાથે મળીને 54 બોલમાં 82 રનની મહત્વપૂર્ણ ભાગીદારી કરીને ઇનિંગને સ્થિરતા આપી.

મુશીર ખાને 73 રનની આક્રમક ઇનિંગ રમી, જ્યારે શ્રેયસના આઉટ થયા બાદ સૂર્યકુમાર યાદવ સાથે ઝડપી રનો ઉમેરાયા. ભારે ધુમ્મસને કારણે મેચને 33 ઓવરની કરવી પડી હતી, છતાં મુંબઈએ 299/9નો મોટો સ્કોર ખડો કર્યો.

શ્રેયસ ઐયરને હવે 11 જાન્યુઆરીથી ન્યૂઝીલેન્ડ સામેની ઘરેલુ વનડે સીરિઝ માટે ભારતીય ટીમમાં પસંદ કરવામાં આવ્યો છે, જોકે તેની ભાગીદારી ફિટનેસ ક્લિયરન્સ પર આધારિત રહેશે. ઓસ્ટ્રેલિયા ટૂર દરમિયાન સિડની ODIમાં પાંસળીની ગંભીર ઈજા થતાં તે લાંબા સમય સુધી ક્રિકેટથી દૂર રહ્યો હતો.

આ તરફ, ભારતીય કેપ્ટન શુભમન ગિલ ગોવા સામે પંજાબ માટે રમ્યો હતો, પરંતુ મોટી ઇનિંગ રમવામાં નિષ્ફળ રહ્યો અને 12 બોલમાં 11 રન બનાવી આઉટ થયો.

શ્રેયસ ઐયરની આ ઇનિંગને ધ્યાનમાં લેતા, ન્યૂઝીલેન્ડ સામેની સીરિઝ પહેલા ભારતીય ટીમ માટે આ એક મોટું સકારાત્મક સંકેત માનવામાં આવી રહ્યો છે.