ચાંદીમાં ₹12,638નો ઐતિહાસિક ઉછાળો: ભાવ ₹3.39 લાખની સપાટીને પાર

ભારતીય વાયદા બજાર MCXમાં શુક્રવાર, 23 જાન્યુઆરી 2026ના રોજ કિંમતી ધાતુઓએ ઇતિહાસ રચ્યો છે. સોનું અને ચાંદી બંનેમાં એકસાથે એવી જોરદાર તેજી જોવા મળી કે અત્યાર સુધીના તમામ રેકોર્ડ તૂટી ગયા. વૈશ્વિક અનિશ્ચિતતા, ડોલરની નબળાઈ અને સલામત રોકાણ તરીકે વધતી માંગે કિંમતી ધાતુઓમાં ભારે ખરીદી જગાવી છે.

ચાંદીમાં અભૂતપૂર્વ ઉછાળો

MCX પર 5 માર્ચ 2026ના ચાંદીના વાયદામાં શુક્રવારે ઇતિહાસની સૌથી મોટી દૈનિક તેજી નોંધાઈ. ગુરુવારે ₹3,27,289 પ્રતિ કિલોગ્રામ પર બંધ થયેલી ચાંદી શુક્રવારે સીધી ₹3,33,333 પર ખુલ્લી. દિવસ દરમિયાન ભારે ખરીદીના કારણે ભાવ ₹3,39,927 પ્રતિ કિલોગ્રામની ઓલ-ટાઈમ હાઈ સપાટીએ પહોંચ્યા.

દિવસ દરમિયાન થોડું નફાવસૂલીનું દબાણ આવતા ભાવ ₹3,32,000 સુધી ઉતર્યા, પરંતુ કુલ ટ્રેન્ડ મજબૂત તેજીનો જ રહ્યો. એક જ દિવસમાં ચાંદીના ભાવમાં ₹12,638નો ઐતિહાસિક વધારો નોંધાયો, જે MCX ઇતિહાસમાં સૌથી મોટો દૈનિક ઉછાળો છે. હાલ ચાંદી લગભગ ₹3,35,621 આસપાસ (2.55% વધારા સાથે) ટ્રેડ થઈ રહી છે.

સોનાએ પણ તોડ્યા તમામ રેકોર્ડ

ચાંદીની સાથે સોનામાં પણ શુક્રવારે નવી ઊંચાઈ જોવા મળી. MCX પર 5 ફેબ્રુઆરી 2026ના સોનાના વાયદામાં ભાવ પ્રથમ વખત ₹1.59 લાખ પ્રતિ 10 ગ્રામને પાર કરી ગયા. ગુરુવારે ₹1,56,341 પર બંધ થયેલું સોનું શુક્રવારે ₹1,58,889 પર ખુલ્યું અને કારોબાર દરમિયાન ₹1,59,226ની નવી સર્વોચ્ચ સપાટી બનાવી.

હાલ સોનું આશરે ₹1,58,216 આસપાસ ટ્રેડ થઈ રહ્યું છે, જેમાં એક જ દિવસે લગભગ ₹1,875 (1.20%)નો વધારો નોંધાયો છે. નિષ્ણાતોના મતે, ભૂ-રાજકીય તણાવ, વ્યાજદરો અંગેની અનિશ્ચિતતા અને ડોલર ઇન્ડેક્સમાં નરમાઈ સોનાને મજબૂત આધાર આપી રહી છે.

ઉત્સાહ સાથે સાવચેતી જરૂરી

સોનું અને ચાંદી બંનેમાં આવેલી આ રેકોર્ડબ્રેક તેજીએ રોકાણકારોમાં ભારે ઉત્સાહ જગાવ્યો છે. વાયદા બજારમાં શોર્ટ કવરિંગ અને નવી ખરીદીથી ભાવ વધુ ઊંચા ગયા છે. જોકે, બજાર વિશ્લેષકો ચેતવણી આપી રહ્યા છે કે આ ઊંચા સ્તરે અસ્થિરતા વધી શકે છે અને નફાવસૂલીના કારણે ટૂંકા ગાળામાં ઉતાર-ચઢાવ શક્ય છે.

તેમ છતાં, લાંબા ગાળે વૈશ્વિક આર્થિક અનિશ્ચિતતા યથાવત રહે તો સોનું અને ચાંદી બંને સલામત રોકાણ તરીકે પોતાની આકર્ષણ જાળવી રાખે તેવી શક્યતા નિષ્ણાતો વ્યક્ત કરી રહ્યા છે.