ICC રેન્કિંગમાં સ્મૃતિ મંધાના બની વિશ્વની નંબર-1 વનડે બેટ; ભારતીય નારીશક્તિનો ડંકો

સ્મૃતિ મંધાનાએ દક્ષિણ આફ્રિકાની લોરા વોલ્વાર્ડને પાછળ છોડીને 790 રેટિંગ પોઈન્ટ્સ સાથે બેટ્સમેનોના ચાર્ટમાં ટોચનું સ્થાન મેળવ્યું છે. વોલ્વાર્ડ અત્યારે 782 પોઈન્ટ્સ સાથે બીજા ક્રમે છે. જોકે, આગામી માર્ચ અને એપ્રિલમાં દક્ષિણ આફ્રિકા અને ન્યૂઝીલેન્ડ વચ્ચે રમાનારી શ્રેણીમાં વોલ્વાર્ડ પાસે ફરીથી નંબર-1 બનવાની તક રહેશે.

બોલિંગમાં એલેના કિંગની ઐતિહાસિક સિદ્ધિ
બોલરોની રેન્કિંગમાં પણ મોટો ફેરફાર જોવા મળ્યો છે. ઓસ્ટ્રેલિયાની સ્પિનર એલેના કિંગ 775 પોઈન્ટ સાથે વિશ્વની નંબર-1 વનડે બોલર બની ગઈ છે. તેણે ઇંગ્લેન્ડની સોફી એક્લેસ્ટનને પછાડી છે, જે છેલ્લા ચાર વર્ષથી સતત ટોચના સ્થાને બિરાજમાન હતી. એલેનાએ ભારત સામેની શ્રેણીમાં ઘાતક બોલિંગ કરતા માત્ર 16.71 ની સરેરાશથી 7 વિકેટ ઝડપી હતી. ખાસ કરીને શ્રેણીની અંતિમ મેચમાં તેણે 33 રન આપીને 4 વિકેટ ખેરવી ઓસ્ટ્રેલિયાને 185 રનની વિશાળ જીત અપાવવામાં મુખ્ય ભૂમિકા ભજવી હતી.

હરમનપ્રીત કૌર ટોપ-10 માં
ઓસ્ટ્રેલિયા સામેની વનડે શ્રેણીમાં મંધાનાએ અનુક્રમે 58 અને 31 રનની મહત્વની ઇનિંગ્સ રમી હતી. અન્ય ખેલાડીઓની વાત કરીએ તો, એલિસા હીલી (744 પોઈન્ટ) ચોથા સ્થાને રહીને નિવૃત્ત થઈ છે, જ્યારે બેથ મૂની ત્રીજા અને એશ્લે ગાર્ડનર પાંચમા ક્રમે છે. ભારતીય કેપ્ટન હરમનપ્રીત કૌરે પણ ટોપ-10માં પોતાનું સ્થાન જાળવી રાખ્યું છે અને તે નવમા સ્થાને છે, જ્યારે યુવા ખેલાડી જેમિમાહ રોડ્રિગ્સ 12મા ક્રમે પહોંચી છે.