સુરતના હજીરામાં હડતાળનો હંગામો! : પાણીપતની ઘટનાના આક્રોશે AM/NS પ્લાન્ટમાં કામ બંધ

સુરતના હજીરા વિસ્તારમાં આવેલા આર્સેલરમિત્તલ નિપ્પોન સ્ટીલ ઇન્ડિયા (AM/NS)ના નિર્માણાધીન પ્લાન્ટમાં ગુસ્સે ભરાયેલા કોન્ટ્રાક્ટ શ્રમિકોએ ઉગ્ર આંદોલન કરતાં તણાવપૂર્ણ પરિસ્થિતિ ઊભી થઈ હતી.

અંદાજે 5000 જેટલા લાર્સન & ટુબ્રો (L&T) સાથે સંકળાયેલા કોન્ટ્રાક્ટ કર્મચારીઓએ પગાર વધારા અને કામના કલાકોને લઈને વિરોધ નોંધાવ્યો હતો. પરિસ્થિતિ કાબૂ બહાર જતા પોલીસે લાઠીચાર્જ કરી 40થી વધુ ટીયરગેસના શેલ છોડ્યા હતા.

શ્રમિકોની મુખ્ય માંગણીઓ

મળતી માહિતી મુજબ, શ્રમિકો લાંબા સમયથી પોતાની માંગણીઓ અંગે રજૂઆત કરતા હતા.

– 12 કલાકની જગ્યાએ 8 કલાકની ડ્યુટી

– ઓવરટાઈમ માટે ડબલ રેટથી ચુકવણી

– ઊંચાઈ પર જોખમી કામ માટે યોગ્ય વેતન વધારો

શ્રમિકોનો આક્ષેપ છે કે જોખમી ઇરેક્શન કામ કરવા છતાં માત્ર 600થી 700 રૂપિયાનું વેતન આપવામાં આવે છે, જે પૂરતું નથી.

હિંસક વળાંક અને તોડફોડ

વહેલી સવારે શરૂ થયેલો વિરોધ થોડા જ સમયમાં હિંસક બની ગયો હતો. ઉશ્કેરાયેલા ટોળાએ કંપનીની ત્રણ ફાયર ફાઇટર ગાડીઓમાં તોડફોડ કરી હતી તેમજ કેટલાક ટુ-વ્હીલરોને આગ ચાંપી હતી.

એન્ટ્રી-એક્ઝિટ ગેટ પર લગાવેલા આધુનિક પ્રવેશ મશીનો અને ઓફિસોમાં પણ નુકસાન પહોંચાડવામાં આવ્યું હતું. આ કારણે પ્લાન્ટ પરિસરમાં ભારે અવ્યવસ્થા ફેલાઈ હતી.

પોલીસની કાર્યવાહી અને અટકાયત

ઘટનાની જાણ થતાં જ સુરત પોલીસ તાત્કાલિક સ્થળ પર પહોંચી હતી. હિંસક ટોળાને કાબૂમાં લેવા માટે 40થી વધુ ટીયરગેસ શેલ છોડવામાં આવ્યા અને હળવો લાઠીચાર્જ કરાયો. કાયદો અને વ્યવસ્થાના ભંગ બદલ 25થી વધુ શ્રમિકોની અટકાયત કરવામાં આવી છે. હાલ સમગ્ર પ્લાન્ટ વિસ્તારમાં ચુસ્ત પોલીસ બંદોબસ્ત ગોઠવાયો છે.