Surat Fire Tragedy: માંગરોળના હથોડા ગામે પેપર ગોડાઉનમાં ભીષણ આગ, 3 વર્ષના માસૂમનું કરુણ મોત

સુરત જિલ્લાના માંગરોળ તાલુકાના હથોડા ગામે આજે એક અત્યંત કરુણ અને હૃદયદ્રાવક ઘટના બની છે. કોસંબા નજીક આવેલા હથોડા ગામમાં પેપરના સામાનથી ભરેલા ગોડાઉનમાં અચાનક ભીષણ આગ ફાટી નીકળી, જેમાં 3 વર્ષના માસૂમ બાળકનું કરુણ મોત નીપજ્યું છે. આ ઘટનાને કારણે સમગ્ર પંથકમાં શોક અને અરેરાટીનો માહોલ છવાઈ ગયો છે.

પ્રાપ્ત માહિતી મુજબ, હથોડા ગામે પતરાના શેડમાં આવેલા પેપરના ગોડાઉન પાસે શ્રમજીવી પરિવારના બે નાના બાળકો રમી રહ્યા હતા. રમત-રમતમાં અચાનક અગમ્ય કારણોસર આગ લાગી, અને ગોડાઉનમાં સંગ્રહિત મોટા પ્રમાણમાં પેપર હોવાને કારણે આગે મિનિટોમાં જ વિકરાળ સ્વરૂપ ધારણ કર્યું.

આગ લાગતા બંને બાળકો જીવ બચાવવા દોડ્યા હતા. જેમાંથી એક બાળક સમયસર બહાર નીકળી જવામાં સફળ રહ્યું, પરંતુ 3 વર્ષનું બાળક આગની લપેટમાં આવી ગયું. આગ એટલી ભીષણ હતી કે કોઈ તેને બચાવી શકે તે પહેલાં જ આખું ગોડાઉન આગમાં ઘેરાઈ ગયું.

ઘટનાની જાણ થતાં જ સુમીલોન ફાયર સ્ટેશન સહિત ત્રણ ફાયર ફાઈટર ટીમો ઘટનાસ્થળે પહોંચી હતી. ભારે જહેમત બાદ આગ પર કાબૂ મેળવવામાં આવ્યો. બાદમાં કુલિંગ પ્રક્રિયા દરમિયાન કાટમાળ અને બળી ગયેલા પેપરના ઢગલા વચ્ચેથી બાળકનો બળી ગયેલી હાલતમાં મૃતદેહ મળ્યો, જે જોઈને હાજર તમામ લોકોની આંખો ભીની થઈ ગઈ હતી.

આ દુર્ઘટનાએ વતનથી દૂર રોજીરોટી કમાવતા શ્રમજીવી પરિવાર પર આભ ફાટી પડ્યું છે. પુત્રના મોતના સમાચાર સાંભળતા જ માતા-પિતાનું હૈયાફાટ રુદન વાતાવરણને ગમગીન બનાવી ગયું. આગમાં ગોડાઉનનો લાખો રૂપિયાનું નુકસાન થયું, પરંતુ પરિવાર માટે સૌથી મોટું નુકસાન તો તેમના માસૂમ બાળકનું જીવન છે.

ઘટનાની ગંભીરતાને ધ્યાને લઈ કોસંબા પોલીસ અને એફએસએલ (FSL) ટીમે તપાસ શરૂ કરી છે. પ્રાથમિક અનુમાન મુજબ આગનું કારણ શોર્ટ સર્કિટ હોઈ શકે છે, પરંતુ સુરક્ષા વ્યવસ્થામાં કોઈ બેદરકારી હતી કે નહીં તે બાબતે તપાસ ચાલુ છે.