The Kerala Story 2 Movie: વિવાદાસ્પદ ફિલ્મનો સિક્વલ તૈયાર, 2026માં થશે રિલીઝ

બોલિવૂડમાં એવી ઘણી ફિલ્મો બની છે જેમણે પોતાના વિષયને કારણે ભારે વિવાદ ઉભા કર્યા છે. એવી જ એક ફિલ્મ હતી વિપુલ અમૃતલાલ શાહની પ્રોડક્શન હેઠળ બનેલી ‘ધ કેરળ સ્ટોરી’. 2023માં રિલીઝ થયેલી આ ફિલ્મ ‘લવ જેહાદ’ જેવા સંવેદનશીલ મુદ્દા પર આધારિત હતી, જેના કારણે તે દેશભરમાં ચર્ચા અને વિવાદનું કેન્દ્ર બની હતી. જોકે, વિવાદો વચ્ચે પણ ફિલ્મે બોક્સ ઓફિસ પર ઐતિહાસિક સફળતા મેળવી હતી. હવે આ ફિલ્મને લઈને એક મોટું અપડેટ સામે આવ્યું છે — ‘ધ કેરળ સ્ટોરી 2’ તૈયાર થઈ ગઈ છે.

2026 બનશે સિક્વલ ફિલ્મોનું વર્ષ

બોલિવૂડ માટે 2026નું વર્ષ સિક્વલ ફિલ્મોથી ભરેલું રહેશે. ‘બોર્ડર 2’, ‘દ્રશ્યમ 3’ જેવી મોટી ફિલ્મો બાદ હવે ‘ધ કેરળ સ્ટોરી 2’ પણ આ યાદીમાં સામેલ થઈ ગઈ છે. મીડિયા રિપોર્ટ મુજબ, ફિલ્મનું શૂટિંગ પૂર્ણ થઈ ગયું છે અને નિર્માતાઓ તેને 2026માં રિલીઝ કરવાની તૈયારીમાં છે.

‘ધ કેરળ સ્ટોરી 2’નું શૂટિંગ પૂર્ણ

અહેવાલો અનુસાર, ‘ધ કેરળ સ્ટોરી 2’નું શૂટિંગ કેરળમાં પૂર્ણ કરવામાં આવ્યું છે. આ વખતની ફિલ્મની કહાની પહેલા ભાગ કરતાં વધુ ગંભીર અને ડાર્ક હોવાનું કહેવાઈ રહ્યું છે. જોકે, ફિલ્મના કલાકારો અને દિગ્દર્શક વિશે હજુ સુધી સત્તાવાર રીતે કોઈ માહિતી જાહેર કરવામાં આવી નથી. નિર્માતાઓએ ફિલ્મને લઈને સંપૂર્ણ ગુપ્તતા જાળવી રાખી છે.

કડક સુરક્ષા હેઠળ થયું શૂટિંગ

સૂત્રોના જણાવ્યા અનુસાર, ફિલ્મના શૂટિંગ દરમિયાન કડક સુરક્ષા વ્યવસ્થા રાખવામાં આવી હતી. સેટ પર મોબાઈલ ફોન પર સંપૂર્ણ પ્રતિબંધ મુકવામાં આવ્યો હતો જેથી ફિલ્મની સ્ટોરી અથવા દૃશ્યો લીક ન થાય. કલાકારો અને ક્રૂ મેમ્બર્સને શૂટિંગ દરમિયાન ફોન વાપરવાની મંજૂરી આપવામાં આવી નહોતી. નિર્માતા વિપુલ અમૃતલાલ શાહ કોઈપણ પ્રકારના વિવાદ અથવા મુશ્કેલીથી બચવા માગતા હતા.

રિલીઝ તારીખ નક્કી

મીડિયા રિપોર્ટ મુજબ, ‘ધ કેરળ સ્ટોરી 2’ 27 ફેબ્રુઆરી 2026ના રોજ સિનેમાઘરોમાં રિલીઝ થશે. જોકે, આ અંગે હજી સત્તાવાર જાહેરાત થવાની બાકી છે.

પહેલા ભાગે જીત્યા હતા બે રાષ્ટ્રીય એવોર્ડ

ભારે વિવાદો છતાં ‘ધ કેરળ સ્ટોરી’ને 71મા રાષ્ટ્રીય ફિલ્મ પુરસ્કારોમાં મોટી સફળતા મળી હતી. ફિલ્મે શ્રેષ્ઠ દિગ્દર્શન અને શ્રેષ્ઠ સિનેમેટોગ્રાફી કેટેગરીમાં બે એવોર્ડ જીત્યા હતા. નોંધનીય છે કે ફિલ્મનું બજેટ માત્ર ₹20 કરોડ હતું, જ્યારે તેણે ભારતીય બોક્સ ઓફિસ પર ₹242.20 કરોડની કમાણી કરી હતી. વૈશ્વિક સ્તરે ફિલ્મે કુલ ₹303.97 કરોડનો વ્યવસાય કર્યો હતો અને તે બ્લોકબસ્ટર સાબિત થઈ હતી.