ગુજરાતમાં ગરમીનો પારો ચઢ્યો: ઉનાળાની શરૂઆતમાં જ હવામાન વિભાગનું યલો ઍલર્ટ

હવામાન વિભાગના જણાવ્યા પ્રમાણે આગામી દિવસોમાં તાપમાન 40 ડિગ્રી સેલ્સિયસને પાર પહોંચી શકે છે. વધતા તાપમાનને કારણે દિવસ દરમિયાન ગરમીનો અનુભવ વધારે થશે. ખાસ કરીને બપોરના સમયે તડકો વધુ તીવ્ર રહેવાની શક્યતા છે,

જેના કારણે લોકોના સ્વાસ્થ્ય પર અસર પડી શકે છે. આગાહી અનુસાર સોમવાર, 9 માર્ચના રોજ રાજકોટ અને કચ્છ જિલ્લામાં હીટવેવ જેવી પરિસ્થિતિ જોવા મળી શકે છે. આ બંને વિસ્તારોમાં તાપમાન સામાન્ય કરતાં વધુ રહેવાની સંભાવના છે. તેથી સ્થાનિક તંત્ર અને આરોગ્ય વિભાગને પણ સાવચેતીના પગલાં લેવા સૂચના આપવામાં આવી છે.

તે બાદ મંગળવાર, 10 માર્ચ અને બુધવાર, 11 માર્ચના રોજ રાજ્યના અનેક જિલ્લાઓમાં કડકડતી ગરમી રહેવાની શક્યતા છે.

અમદાવાદ, ગાંધીનગર, બનાસકાંઠા, વડોદરા, સુરત, કચ્છ, અમરેલી, રાજકોટ, સુરેન્દ્રનગર, ભાવનગર અને બોટાદ જેવા જિલ્લાઓ માટે યલો ઍલર્ટ જાહેર કરવામાં આવ્યું છે. આ વિસ્તારોમાં દિવસ દરમિયાન તાપમાન ઊંચું રહેવાની સાથે ગરમ પવન પણ ફૂંકાઈ શકે છે.

તંત્ર દ્વારા નાગરિકોને ખાસ સૂચના

ગરમીના વધતા પ્રભાવને ધ્યાનમાં રાખીને તંત્ર દ્વારા નાગરિકોને ખાસ સૂચનાઓ આપવામાં આવી છે. બપોરે 12 વાગ્યાથી સાંજે 4 વાગ્યા સુધી શક્ય હોય તો ઘરની બહાર ન નીકળવાની સલાહ આપવામાં આવી છે,

કારણ કે આ સમય દરમિયાન તડકો સૌથી વધુ તીવ્ર રહે છે. જો બહાર જવું ખૂબ જરૂરી હોય તો સાવચેતી રાખવી જરૂરી છે. ગરમીથી બચવા માટે હળવા અને આછા રંગના સુતરાઉ કપડાં પહેરવા સૂચવાયું છે.

આ પ્રકારના કપડાં શરીરને ઠંડક આપવામાં મદદરૂપ બને છે. ઉપરાંત માથા પર ટોપી, સ્કાર્ફ અથવા છત્રીનો ઉપયોગ કરવાથી સીધા તડકાથી થોડી રાહત મળી શકે છે.