સલમાન ખાનની ફિલ્મનું નામ બદલવાનું કારણ સામે આવ્યું

સલમાનની જે ફિલ્મની લાંબા સમયથી ‘બેટલ ઓફ ગલવાન’ તરીકે ચર્ચા થઈ રહી હતી, તેનું શીર્ષક હવે બદલી દેવામાં આવ્યું છે. સલમાન ખાને પોતે સોશિયલ મીડિયા પર આ ફિલ્મનું નવું પોસ્ટર શેર કરીને જાહેરાત કરી છે કે હવે આ ફિલ્મ “માતૃભૂમિ: મે વોર રેસ્ટ ઇન પીસ” (Matrubhumi: May War Rest In Peace) તરીકે ઓળખાશે. આ અચાનક થયેલા ફેરફારે ચાહકોમાં કુતૂહલ જગાડ્યું છે.

2020ના ગલવાન સંઘર્ષ પર આધારિત છે વાર્તા
આ ફિલ્મ ભારત અને ચીન વચ્ચે 2020માં થયેલા ગલવાન ઘાટીના સંઘર્ષ પર આધારિત છે. ફિલ્મમાં સલમાન ખાન એક શક્તિશાળી સૈનિકની ભૂમિકામાં જોવા મળશે અને તેની સામે પ્રથમવાર અભિનેત્રી ચિત્રાંગદા સિંહ મુખ્ય ભૂમિકામાં નજરે પડશે. ફિલ્મનું ટીઝર અગાઉ રિલીઝ થઈ ચૂક્યું છે, જેને પ્રેક્ષકો તરફથી મિશ્ર પ્રતિસાદ મળ્યો હતો. દિગ્દર્શકનું કહેવું છે કે “માતૃભૂમિ: મે વોર રેસ્ટ ઇન પીસ” એ યુદ્ધની વચ્ચે પણ માનવતાનું રક્ષણ કરવાની વાત કરે છે.

શા માટે બદલવામાં આવ્યું ફિલ્મનું નામ?
ફિલ્મના શીર્ષકમાં થયેલા આ મોટા ફેરફાર અંગે દિગ્દર્શક અપૂર્વ લાખિયાએ મૌન તોડ્યું છે. તેમણે સ્પષ્ટતા કરી હતી કે આ નિર્ણય રાતોરાત લેવામાં આવ્યો નથી. તેમણે જણાવ્યું કે, “સલમાન સરના ચાહકોને આ ફેરફાર અચાનક લાગી શકે છે, પરંતુ અમારી પાસે શરૂઆતથી જ બે ટાઇટલ રજિસ્ટર્ડ હતા – ‘બેટલ ઓફ ગલવાન’ અને ‘માતૃભૂમિ’. શૂટિંગ દરમિયાન અમને સમજાયું કે આ વાર્તા માત્ર સરહદ પર લડાતા યુદ્ધ પૂરતી સીમિત નથી. આ ફિલ્મ માનવતા, સૈનિકોના મૌન સંઘર્ષ અને તેમના બલિદાનની લાગણીઓ વિશે છે.” અપૂર્વના મતે, ‘માતૃભૂમિ’ શીર્ષક ફિલ્મની ભાવનાને વધુ સારી રીતે રજૂ કરે છે. ફિલ્મમાં આ જ નામનું એક ગીત પણ છે, જેને લોકોએ ખૂબ પસંદ કર્યું છે, જેના કારણે ટીમને લાગ્યું કે આ શીર્ષક વધુ યોગ્ય રહેશે.