‘કિસ કિસકો પ્યાર કરું 2’ ની થિયેટર રિલીઝ છેલ્લી ક્ષણે અટકી, ફેન્સને મોટો ઝટકો

કોમેડી કિંગ કપિલ શર્માના ચાહકો માટે નિરાશાજનક સમાચાર સામે આવ્યા છે. તેમની ફિલ્મ ‘કિસ કિસકો પ્યાર કરું 2’ ની થિયેટર રિલીઝ ફરી એકવાર છેલ્લી ક્ષણે અટકાવી દેવામાં આવી છે. ફિલ્મ 9 જાન્યુઆરીએ સિનેમાઘરોમાં રિલીઝ થવાની હતી, પરંતુ હવે તે તારીખે રિલીઝ નહીં થાય.

મેકર્સના જણાવ્યા અનુસાર, ફિલ્મને થિયેટરોમાં પૂરતી સ્ક્રીન્સ અને યોગ્ય શો ટાઈમિંગ મળતા નહોતા. અગાઉ ફિલ્મ રણવીર સિંહની ફિલ્મ ‘ધુરંધર’ ની રિલીઝ પછી આવી હતી, જેમાં મોટા ભાગની સ્ક્રીન્સ તે ફિલ્મને ફાળવાઈ ગઈ હતી. આ કારણે ‘કિસ કિસકો પ્યાર કરું 2’ દર્શકો સુધી યોગ્ય રીતે પહોંચી શકી નહોતી.

મેકર્સે ફિલ્મને ફરીથી થિયેટરમાં લાવવાનો પ્રયાસ કર્યો હતો, પરંતુ આ વખતે પણ સ્ક્રીન્સ અને ટાઈમ સ્લોટની સમસ્યા યથાવત રહેતાં રિલીઝ ટાળવાનો નિર્ણય લેવામાં આવ્યો છે. હાલ ફિલ્મની નવી રિલીઝ તારીખ અંગે કોઈ સત્તાવાર જાહેરાત કરવામાં આવી નથી, જોકે ટૂંક સમયમાં ઓફિશિયલ સ્ટેટમેન્ટ આવવાની શક્યતા છે.

ફિલ્મમાં કપિલ શર્મા સાથે મનજોત સિંહ, હીરા વરીના, ત્રિધા ચૌધરી, પારુલ ગુલાટી અને આયશા ખાન મહત્વની ભૂમિકામાં જોવા મળે છે. અનુકલ્પ ગોસ્વામી દ્વારા લખાયેલી અને ડાયરેક્ટ કરાયેલી આ ફિલ્મને મિક્સ્ડ રિવ્યૂ મળ્યા હતા. ખાસ વાત એ છે કે કપિલની રિયલ લાઈફ પત્ની ગિન્ની ચતરથ પણ ફિલ્મમાં જોવા મળી હતી.

ફિલ્મો સિવાય કપિલ શર્મા હાલમાં ‘ધ ગ્રેટ ઈન્ડિયન કપિલ શો’ માં વ્યસ્ત છે, જેમાં આવનારા એપિસોડ્સમાં ભોજપુરી ફિલ્મ ઇન્ડસ્ટ્રીના જાણીતા સ્ટાર્સ જોવા મળશે.